koi taswir is dil mein sajai jaane wali hai

koī tasvīr is dil meñ sajā.ī jaane vaalī hai

kisī ke naam kī taḳhtī lagā.ī jaane vaalī hai

ḳhushī kaise mire dil kī chhupā.ī jaane vaalī hai

ki mahfil terī aamad pe sajā.ī jaane vaalī hai

mujhe us ne batāyā hai sabab ye bevafā.ī kā

vafā kī rasm duniyā se uThā.ī jaane vaalī hai

ravā hai maslahat-koshī mujhe ab dekhnā ye hai

havā se dostī kab tak nibhā.ī jaane vaalī hai

dabā rakkhī thī hākim ne ka.ī barsoñ se lekin ab

vahī āvāz-e-haq phir se uThā.ī jaane vaalī hai

na.e qārūn ne khole haiñ khāte ġhair mulkoñ meñ

jahāñ ab qaum kī daulat chhupā.ī jaane vaalī hai

ḳhudā ḳhud ko samajh baiThā banā fir'aun jaise tū

tirī fir.auniyat ab ke miTā.ī jaane vaalī hai

payām-e-dilbarī dil ke sahīfe par likhā maiñ ne

vahī tahrīr ab dil se miTā.ī jaane vaalī hai

agar tum ye samajhte ho mujhe tum bhuul jāoge

haqīqat tum ko duniyā meñ dikhā.ī jaane vaalī hai

sunā bhaa.ī ko bhaa.ī se alag honā hai lāzim ab

na.ī dīvār rishtoñ meñ uThā.ī jaane vaalī hai

dabe paañv nikal aa.ī thī kal maiñ jis kahānī se

kahānī ab vahī 'shamsa' sunā.ī jaane vaalī hai

koi taswir is dil mein sajai jaane wali hai

kisi ke nam ki taKHti lagai jaane wali hai

KHushi kaise mere dil ki chhupai jaane wali hai

ki mahfil teri aamad pe sajai jaane wali hai

mujhe us ne bataya hai sabab ye bewafai ka

wafa ki rasm duniya se uThai jaane wali hai

rawa hai maslahat-koshi mujhe ab dekhna ye hai

hawa se dosti kab tak nibhai jaane wali hai

daba rakkhi thi hakim ne kai barson se lekin ab

wahi aawaz-e-haq phir se uThai jaane wali hai

nae qarun ne khole hain khate ghair mulkon mein

jahan ab qaum ki daulat chhupai jaane wali hai

KHuda KHud ko samajh baiTha bana fir'aun jaise tu

teri firauniyat ab ke miTai jaane wali hai

payam-e-dilbari dil ke sahife par likha main ne

wahi tahrir ab dil se miTai jaane wali hai

agar tum ye samajhte ho mujhe tum bhul jaoge

haqiqat tum ko duniya mein dikhai jaane wali hai

suna bhai ko bhai se alag hona hai lazim ab

nai diwar rishton mein uThai jaane wali hai

dabe panw nikal aai thi kal main jis kahani se

kahani ab wahi 'shamsa' sunai jaane wali hai