koi taswir koi naqsh banate rahiye

koī tasvīr koī naqsh banāte rahiye

dil ko duniyā meñ bahar-taur lagāte rahiye

dekhnā naag na Das le kahīñ ḳhāmoshī kā

vaqt ke saaz pe naġhma koī gaate rahiye

har ghaḌī sāmne rakhiye koī taaza manzar

har ghaḌī soch ke pardoñ ko uThāte rahiye

rāh-e-dushvār bhī ho jaatī hai āsāñ aksar

hausla rakh ke agar paañv baḌhāte rahiye

in añdheroñ se koī chāñd na ubhre jab tak

tīrgī hī pe koī naqsh banāte rahiye

laakh dushvār sahī dānish-o-hikmat ke tufail

nau-ba-nau moḌ pe taqdīr ko laate rahiye

apnī sūrat se na ho jā.ūñ kahīñ begāna

aap har pal mujhe ā.īna dikhāte rahiye

har fasāna mire afsāne kā hissa hogā

aap 'unvān koī rakh ke sunāte rahiye

ḳhud hī aa jā.egā jiine kā salīqa 'mohsin'

in havādis ko gale baḌh ke lagāte rahiye

koi taswir koi naqsh banate rahiye

dil ko duniya mein bahar-taur lagate rahiye

dekhna nag na Das le kahin KHamoshi ka

waqt ke saz pe naghma koi gate rahiye

har ghaDi samne rakhiye koi taza manzar

har ghaDi soch ke pardon ko uThate rahiye

rah-e-dushwar bhi ho jati hai aasan aksar

hausla rakh ke agar panw baDhate rahiye

in andheron se koi chand na ubhre jab tak

tirgi hi pe koi naqsh banate rahiye

lakh dushwar sahi danish-o-hikmat ke tufail

nau-ba-nau moD pe taqdir ko late rahiye

apni surat se na ho jaun kahin begana

aap har pal mujhe aaina dikhate rahiye

har fasana mere afsane ka hissa hoga

aap 'unwan koi rakh ke sunate rahiye

KHud hi aa jaega jine ka saliqa 'mohsin'

in hawadis ko gale baDh ke lagate rahiye