koi to hai jo aahon mein asar aane nahin deta

koī to hai jo aahoñ meñ asar aane nahīñ detā

mire naḳhl-e-tamannā pe samar aane nahīñ detā

liye phirtā hai mujh ko qarya qarya kū-ba-kū har dam

magar saare safar meñ merā ghar aane nahīñ detā

mire ḳhuuñ se jalātā hai charāġh-e-shahr-e-ahl-e-zar

mire hī ghar ke āñgan meñ sahar aane nahīñ detā

khilātā hai vo dil meñ nit-na.e gul ārzūoñ ke

magar hoñToñ talak is kī ḳhabar aane nahīñ detā

jidhar bhī dekhtā huuñ maiñ nazar aatā hai bas vo hī

mujhe apne alāva kuchh nazar aane nahīñ detā

khulā rakhtā hai mere sāmne aflāk kā manzar

magar kuchh soch kar vo mere par aane nahīñ detā

ḳhudāyā vaqt ke us paar kyā asrār haiñ pinhāñ

musāfir ko kabhī to lauT kar aane nahīñ detā

maiñ jaanā chāhtā huuñ par mirī majbūriyāñ 'imrran'

vo aanā chāhtā hai koī Dar aane nahīñ detā

koi to hai jo aahon mein asar aane nahin deta

mere naKHl-e-tamanna pe samar aane nahin deta

liye phirta hai mujh ko qarya qarya ku-ba-ku har dam

magar sare safar mein mera ghar aane nahin deta

mere KHun se jalata hai charagh-e-shahr-e-ahl-e-zar

mere hi ghar ke aangan mein sahar aane nahin deta

khilata hai wo dil mein nit-nae gul aarzuon ke

magar honTon talak is ki KHabar aane nahin deta

jidhar bhi dekhta hun main nazar aata hai bas wo hi

mujhe apne alawa kuchh nazar aane nahin deta

khula rakhta hai mere samne aflak ka manzar

magar kuchh soch kar wo mere par aane nahin deta

KHudaya waqt ke us par kya asrar hain pinhan

musafir ko kabhi to lauT kar aane nahin deta

main jaana chahta hun par meri majburiyan 'imrran'

wo aana chahta hai koi Dar aane nahin deta