koi ummid nahin baqi magar dekhte hain

koī ummīd nahīñ baaqī magar dekhte haiñ

bistar-e-marg pe haiñ jānib-e-dar dekhte haiñ

ek mahtāb sar-e-bām-e-falak hai raushan

aur hasrat se use ḳhāk-basar dekhte haiñ

ab mirī zaat kī le kar bhī talāshī kyā hai

maiñ udhar huuñ hī nahīñ aap jidhar dekhte haiñ

itnī shiddat se tirī kam-nazarī kā dukh hai

jitnī hairat se mujhe ahl-e-nazar dekhte haiñ

jitne raste haiñ mirī vāpsī par hañste haiñ

aur hiqārat se kināroñ ke shajar dekhte haiñ

aap bhī gher ke laa.e hue lagte haiñ yahāñ

aap bhī kis se muḳhātib haiñ kidhar dekhte haiñ

koi ummid nahin baqi magar dekhte hain

bistar-e-marg pe hain jaanib-e-dar dekhte hain

ek mahtab sar-e-baam-e-falak hai raushan

aur hasrat se use KHak-basar dekhte hain

ab meri zat ki le kar bhi talashi kya hai

main udhar hun hi nahin aap jidhar dekhte hain

itni shiddat se teri kam-nazari ka dukh hai

jitni hairat se mujhe ahl-e-nazar dekhte hain

jitne raste hain meri wapsi par hanste hain

aur hiqarat se kinaron ke shajar dekhte hain

aap bhi gher ke lae hue lagte hain yahan

aap bhi kis se muKHatib hain kidhar dekhte hain