koi wazifa mujhe bhi bata mere darwesh

koī vazīfa mujhe bhī batā mire darvesh

tujhe huī hai faqīrī atā mire darvesh

mirī ḳhatā to bas itnī hai is ta.alluq meñ

yahī ki honī ko hone diyā mire darvesh

ise maiñ pyaar mohabbat kā naam kaise duuñ

ye aur tarah kā hai tajraba mire darvesh

ki jis ne bāñdh diyā terī zaat se mujh ko

ye ruuh kā hai koī silsila mire darvesh

har ek saañs juḌī hai tirī razā ke saath

to kyā yahī hai mukammal vafā mire darvesh

tū zindagī kā sitāra bhī isti.āra bhī

mire liye tū hai sūraj-numā mere darvesh

ye terā ishq mahaktā hai raat din mujh meñ

ki aur kuchh nahīñ mujh meñ nayā mire darvesh

ki ab vajūd se maujūd se nahīñ hai ġharaz

hai lā-vajūd kī mujh meñ sadā mire darvesh

koi wazifa mujhe bhi bata mere darwesh

tujhe hui hai faqiri ata mere darwesh

meri KHata to bas itni hai is talluq mein

yahi ki honi ko hone diya mere darwesh

ise main pyar mohabbat ka nam kaise dun

ye aur tarah ka hai tajraba mere darwesh

ki jis ne bandh diya teri zat se mujh ko

ye ruh ka hai koi silsila mere darwesh

har ek sans juDi hai teri raza ke sath

to kya yahi hai mukammal wafa mere darwesh

tu zindagi ka sitara bhi istiara bhi

mere liye tu hai suraj-numa mere darwesh

ye tera ishq mahakta hai raat din mujh mein

ki aur kuchh nahin mujh mein naya mere darwesh

ki ab wajud se maujud se nahin hai gharaz

hai la-wajud ki mujh mein sada mere darwesh