koi ye iqbaal se ja kar zara puchhe ziya

koī ye 'iqbāl' se jā kar zarā pūchhe 'ziyā'

muddatoñ se kyuuñ tirī bāñg-e-darā ḳhāmosh hai

ek arsa ho gayā naġhme nahīñ firdaus-e-gosh

tishna-e-sāz-e-lab-e-'iqbāl' har ik gosh hai

bazm-e-hastī meñ vahī ab tak hai paidā intishār

ḳhud hī muslim muztarib hai ḳhud musībat-kosh hai

is gulistāñ meñ manāzir kā vahī hai rañg bhī

dekhne vaalā fareb-e-dīd meñ mad.hosh hai

ḳhuuñ shahīdoñ kā ravāñ hai jañg ke maidān meñ

aur ġhāzī kī zabāñ par nārā-e-pur-josh hai

kyā qalam jaulāniyāñ apnī dikhā saktā nahīñ

vo qalam jis kī navā bhī suur kī ham-dosh hai

kyā tire jazbāt ke sho.ale bhaḌak sakte nahīñ

kyā tirā vo gulḳhan-e-pur-soz ab gul-posh hai

kyā abhī baaqī hai terī ruuh meñ aglī taḌap

aa maiñ dekhūñ ab bhī kyā siine meñ tere josh hai

hashr hai aalam meñ barpā aur tū hai mutma.in

shor hai mahfil meñ paidā aur tū ḳhāmosh hai

jaag uTThī qaum tere naġhma-e-bedār se

pahle vo behosh thī aur aaj to behosh hai

kund talvāreñ huiiñ ahd-e-zira-poshī gayā

jaag uTh ġhaflat se vaqt-e-ḳhud-farāmoshī gayā

koi ye 'iqbaal' se ja kar zara puchhe 'ziya'

muddaton se kyun teri bang-e-dara KHamosh hai

ek arsa ho gaya naghme nahin firdaus-e-gosh

tishna-e-saz-e-lab-e-'iqbaal' har ek gosh hai

bazm-e-hasti mein wahi ab tak hai paida intishaar

KHud hi muslim muztarib hai KHud musibat-kosh hai

is gulistan mein manazir ka wahi hai rang bhi

dekhne wala fareb-e-did mein madhosh hai

KHun shahidon ka rawan hai jang ke maidan mein

aur ghazi ki zaban par nara-e-pur-josh hai

kya qalam jaulaniyan apni dikha sakta nahin

wo qalam jis ki nawa bhi sur ki ham-dosh hai

kya tere jazbaat ke shoale bhaDak sakte nahin

kya tera wo gulKHan-e-pur-soz ab gul-posh hai

kya abhi baqi hai teri ruh mein agli taDap

aa main dekhun ab bhi kya sine mein tere josh hai

hashr hai aalam mein barpa aur tu hai mutmain

shor hai mahfil mein paida aur tu KHamosh hai

jag uTThi qaum tere naghma-e-bedar se

pahle wo behosh thi aur aaj to behosh hai

kund talwaren huin ahd-e-zira-poshi gaya

jag uTh ghaflat se waqt-e-KHud-faramoshi gaya