koshishen be-sud hain bekar har tadbir hai

koshisheñ be-sūd haiñ bekār har tadbīr hai

husn kī sarkār meñ har aah be-tāsīr hai

vo nazar kuchh aur shai hai tiir phir bhī tiir hai

asl hai phir asl hī tasvīr phir tasvīr hai

ai junūñ ye to batā kambaḳht tere paañv meñ

dhajjiyāñ dāman kī haiñ yā halqa-e-zanjīr hai

sū-e-zan thā jis ke muñh par nutq kā itlāq bhī

guftugū se us kī hairāñ ḳhud lab-e-taqrīr hai

har tamanna hai mirī ab be-niyāz-e-mudda.ā

aaj har naala mirā mustaġhnī-e-tāsīr hai

ibtidā hī ibtidā hai intihā is kī nahīñ

dar-haqīqat ye mohabbat ḳhvāb-e-be-ta.abīr hai

chal rahā hai un kī nazroñ par mirā har iḳhtiyār

sar se pā tak zindagī bāzīcha-e-taqdīr hai

rok letīñ ham ko kyā dīvār kī sangīniyāñ

kuchh adab zindāñ kā hai kuchh azmat-e-zanjīr hai

jazb kar liiñ ishq ne kyā husn kī rangīniyāñ

kal jahāñ vo jalva-gar the ab mirī tasvīr hai

ab qadam baḌhne lagā hadd-e-ta.ayyun se mirā

zarra-zarra aaj tere husn kī tanvīr hai

rahm kar hālat pe apnī ai nigāh-e-iltifāt

aaj merī har nazar ik husn kī tasvīr hai

ye hai takmīl-e-mohabbat yā sitam kī intihā

aaj har naala mirā ek paikar-e-tāsīr hai

sar se pā tak ārzū-e-dost ban kar ai 'munīr'

be-niyāz-e-mudda.ā ban jā yahī iksīr hai

koshishen be-sud hain bekar har tadbir hai

husn ki sarkar mein har aah be-tasir hai

wo nazar kuchh aur shai hai tir phir bhi tir hai

asl hai phir asl hi taswir phir taswir hai

ai junun ye to bata kambaKHt tere panw mein

dhajjiyan daman ki hain ya halqa-e-zanjir hai

su-e-zan tha jis ke munh par nutq ka itlaq bhi

guftugu se us ki hairan KHud lab-e-taqrir hai

har tamanna hai meri ab be-niyaz-e-muddaa

aaj har nala mera mustaghni-e-tasir hai

ibtida hi ibtida hai intiha is ki nahin

dar-haqiqat ye mohabbat KHwab-e-be-tabir hai

chal raha hai un ki nazron par mera har iKHtiyar

sar se pa tak zindagi bazicha-e-taqdir hai

rok letin hum ko kya diwar ki sanginiyan

kuchh adab zindan ka hai kuchh azmat-e-zanjir hai

jazb kar lin ishq ne kya husn ki ranginiyan

kal jahan wo jalwa-gar the ab meri taswir hai

ab qadam baDhne laga hadd-e-tayyun se mera

zarra-zarra aaj tere husn ki tanwir hai

rahm kar haalat pe apni ai nigah-e-iltifat

aaj meri har nazar ek husn ki taswir hai

ye hai takmil-e-mohabbat ya sitam ki intiha

aaj har nala mera ek paikar-e-tasir hai

sar se pa tak aarzu-e-dost ban kar ai 'munir'

be-niyaz-e-muddaa ban ja yahi iksir hai