kuan bhi khod liya phir bhi dil pareshan hai

kuaañ bhī khod liyā phir bhī dil pareshāñ hai

ab is ilāqe se bādal bahut gurezāñ hai

badan-darīda zamīñ duur tak hai phailī huī

harā sā ek shajar ḳhud pe kitnā nāzāñ hai

kahīñ se koī bhī ḳhush-kun ḳhabar nahīñ aa.ī

burā hai vaqt abhī har ḳhushī gurezāñ hai

bayān-e-dard-o-alam ab koī kare kis se

har ek shaḳhs kisī mas.ale meñ ġhaltāñ hai

dikhā ke aadmī aur jānvar kī tasvīreñ

ye pūchhā bachchī ne donoñ meñ kaun haivāñ hai

safedī us pe zabāñ se na pher pā.egā

siyāhī dil kī tirī aañkh se numāyāñ hai

jahāñ meñ phaile añdheroñ kā hai ye Dar kaisā

diloñ meñ sham' jab īmān kī farozāñ hai

koī ḳhushī bhī kahāñ lagtī hai ḳhushī kī tarah

ba-roz-e-īd bhī ab kaun kitnā nādāñ hai

ho ahl-e-hosh yā dasht-e-junūñ kā bāshinda

kisī kā aaj salāmat nahīñ garebāñ hai

kuan bhi khod liya phir bhi dil pareshan hai

ab is ilaqe se baadal bahut gurezan hai

badan-darida zamin dur tak hai phaili hui

hara sa ek shajar KHud pe kitna nazan hai

kahin se koi bhi KHush-kun KHabar nahin aai

bura hai waqt abhi har KHushi gurezan hai

bayan-e-dard-o-alam ab koi kare kis se

har ek shaKHs kisi masale mein ghaltan hai

dikha ke aadmi aur jaanwar ki taswiren

ye puchha bachchi ne donon mein kaun haiwan hai

safedi us pe zaban se na pher paega

siyahi dil ki teri aankh se numayan hai

jahan mein phaile andheron ka hai ye Dar kaisa

dilon mein sham' jab iman ki farozan hai

koi KHushi bhi kahan lagti hai KHushi ki tarah

ba-roz-e-id bhi ab kaun kitna nadan hai

ho ahl-e-hosh ya dasht-e-junun ka bashinda

kisi ka aaj salamat nahin gareban hai