kuchh aise aa raha hai husn-e-yar aahista aahista

kuchh aise aa rahā hai husn-e-yār āhista āhista

chaman meñ jaise aatī hai bahār āhista āhista

ye hasrat ye tamanna hai ki ai kaash us ke qadmoñ tak

pahuñch jaa.e mirā musht-e-ġhubār āhista āhista

mire zaḳhmoñ se phaTtā hai kaleja chārasāzoñ kā

ki jab rotā huuñ maiñ sīna-figār āhista āhista

manāzil ishq kī yuuñ roz-o-shab tai kar rahā huuñ maiñ

ki jaise gardish-e-lail-o-nahār āhista āhista

utar jaatā hai rafta rafta sab nashsha javānī kā

chalā jaatā hai ḳhud ranj-e-ḳhumār āhista āhista

azal se dosh par umr-e-ravāñ ke haath hai merā

pahuñch jā.ūñgā maiñ zer-e-mazār āhista āhista

nahīf-o-zār huuñ lekin mujhe jaanā hai us had tak

pahuñch jā.ūñgā maiñ bhī sū-e-dār āhista āhista

mohabbat kā maraz bhī kyā burī shai hai tabīboñ ko

sunātā huuñ maiñ apnā hāl-e-zār āhista āhista

kisī kī nok-e-mizhgāñ chubhtī hai har-dam rag-e-jāñ meñ

chalātā hai koī ḳhanjar kī dhaar āhista āhista

maiñ kar detā huuñ yā-rab sab havāle terī rahmat ke

gunāh apne jo kartā huuñ shumār āhista āhista

unheñ kyā ḳhauf hai jo haiñ shanāvar bahr-e-ulfat ke

vo is dariyā se ho jaate haiñ paar āhista āhista

chale jab girte paḌte 'sabr' mai-ḳhāna se ham pī kar

to bolī duḳhtar-e-raz hoshiyār āhista āhista

kuchh aise aa raha hai husn-e-yar aahista aahista

chaman mein jaise aati hai bahaar aahista aahista

ye hasrat ye tamanna hai ki ai kash us ke qadmon tak

pahunch jae mera musht-e-ghubar aahista aahista

mere zaKHmon se phaTta hai kaleja chaarasazon ka

ki jab rota hun main sina-figar aahista aahista

manazil ishq ki yun roz-o-shab tai kar raha hun main

ki jaise gardish-e-lail-o-nahaar aahista aahista

utar jata hai rafta rafta sab nashsha jawani ka

chala jata hai KHud ranj-e-KHumar aahista aahista

azal se dosh par umr-e-rawan ke hath hai mera

pahunch jaunga main zer-e-mazar aahista aahista

nahif-o-zar hun lekin mujhe jaana hai us had tak

pahunch jaunga main bhi su-e-dar aahista aahista

mohabbat ka maraz bhi kya buri shai hai tabibon ko

sunata hun main apna haal-e-zar aahista aahista

kisi ki nok-e-mizhgan chubhti hai har-dam rag-e-jaan mein

chalata hai koi KHanjar ki dhaar aahista aahista

main kar deta hun ya-rab sab hawale teri rahmat ke

gunah apne jo karta hun shumar aahista aahista

unhen kya KHauf hai jo hain shanawar bahr-e-ulfat ke

wo is dariya se ho jate hain par aahista aahista

chale jab girte paDte 'sabr' mai-KHana se hum pi kar

to boli duKHtar-e-raz hoshiyar aahista aahista