kuchh aise haal-o-mazi tere afsane bhi hote hain

kuchh aise hāl-o-māzī tere afsāne bhī hote haiñ

jo har māhaul-e-mustaqbil ko dohrāne bhī hote haiñ

jo ehsās-e-javānī kī hasīñ ḳhalvat meñ palte haiñ

vo jalve manzar-e-jazbāt par laane bhī hote haiñ

ḳhamoshī dāstāñ hai ismat-e-unvān-e-hastī kī

ḳhamoshī meñ nihāñ ismat ke afsāne bhī hote haiñ

harīm-e-dil meñ tujh ko kāvish-e-ġham ham bhī pūchheñge

tasavvur meñ tire aksar sanam-ḳhāne bhī hote haiñ

kabhī tūfāñ meñ ruḳh maujeñ badal detī haiñ jab apnā

safīne sāhiloñ par lā ke Takrāne bhī hote haiñ

aqīdat shart hai ai 'zeb' jazbāt-e-aqīdat kī

haram kī raah meñ ta.amīr but-ḳhāne bhī hote haiñ

kuchh aise haal-o-mazi tere afsane bhi hote hain

jo har mahaul-e-mustaqbil ko dohrane bhi hote hain

jo ehsas-e-jawani ki hasin KHalwat mein palte hain

wo jalwe manzar-e-jazbaat par lane bhi hote hain

KHamoshi dastan hai ismat-e-unwan-e-hasti ki

KHamoshi mein nihan ismat ke afsane bhi hote hain

harim-e-dil mein tujh ko kawish-e-gham hum bhi puchhenge

tasawwur mein tere aksar sanam-KHane bhi hote hain

kabhi tufan mein ruKH maujen badal deti hain jab apna

safine sahilon par la ke Takrane bhi hote hain

aqidat shart hai ai 'zeb' jazbaat-e-aqidat ki

haram ki rah mein tamir but-KHane bhi hote hain