kuchh apne daur ki bhi kahani likha karo

kuchh apne daur kī bhī kahānī likhā karo

patthar ko mom ḳhuun ko paanī likhā karo

jiddat kī rau meñ log kahāñ se kahāñ ga.e

tum se bane to baat purānī likhā karo

vo ahd hai ki shola-fishāñ bijliyoñ ko bhī

ġhazloñ meñ rañg-o-nūr kī raanī likhā karo

lafzoñ ko apne asl ma.ānī se aar hai

ab dostoñ ko dushman-e-jānī likhā karo

hai be-hisoñ kī bhiiḌ na hogā koī asar

aḳhbār meñ hazār girānī likhā karo

likhne ke vāste koī unvān chāhiye

fariyād-o-āh-o-ashk-fishānī likhā karo

shohrat ke ḳhvāstgāro mirā mashvara hai ye

'ġhālib' kā apne aap ko saanī likhā karo

'dānish' zah-e-nasīb mile zaḳhm-e-lāla-rañg

har zaḳhm-e-dil ko un kī nishānī likhā karo

kuchh apne daur ki bhi kahani likha karo

patthar ko mom KHun ko pani likha karo

jiddat ki rau mein log kahan se kahan gae

tum se bane to baat purani likha karo

wo ahd hai ki shola-fishan bijliyon ko bhi

ghazlon mein rang-o-nur ki rani likha karo

lafzon ko apne asl maani se aar hai

ab doston ko dushman-e-jaani likha karo

hai be-hison ki bhiD na hoga koi asar

aKHbar mein hazar girani likha karo

likhne ke waste koi unwan chahiye

fariyaad-o-ah-o-ashk-fishani likha karo

shohrat ke KHwastgaro mera mashwara hai ye

'ghaalib' ka apne aap ko sani likha karo

'danish' zah-e-nasib mile zaKHm-e-lala-rang

har zaKHm-e-dil ko un ki nishani likha karo