kuchh apni baat kaho kuchh meri suno mat so

kuchh apnī baat kaho kuchh mirī suno mat so

ye raat phir nahīñ aane kī dosto mat so

kise ḳhabar ki sabā kyā payām le aa.e

sadā diloñ ke darīche khule rakho mat so

bujhīñ jo sham.eñ to raushan karo diloñ ke charāġh

na bujhne vaale sitāroñ kā saath do mat so

jo sun sako to suno tishna-rūh kī fariyād

misāl-e-sāġhar mai-e-daur meñ raho mat so

ḳhirad kā kahnā hai so jaao vo na aa.egā

pukār dil kī yūñhī jāgte raho mat so

na so sakeñ jo ham āvārgān-e-kūcha-e-shauq

to tum bhī shahr kī shab-tāb mah-vasho mat so

ye jaltī-bujhtī sī yādoñ kī kahkashāñ 'ishqī'

bikhar na jaa.e ġhazal hī koī kaho mat so

kuchh apni baat kaho kuchh meri suno mat so

ye raat phir nahin aane ki dosto mat so

kise KHabar ki saba kya payam le aae

sada dilon ke dariche khule rakho mat so

bujhin jo shamen to raushan karo dilon ke charagh

na bujhne wale sitaron ka sath do mat so

jo sun sako to suno tishna-ruh ki fariyaad

misal-e-saghar mai-e-daur mein raho mat so

KHirad ka kahna hai so jao wo na aaega

pukar dil ki yunhi jagte raho mat so

na so saken jo hum aawargan-e-kucha-e-shauq

to tum bhi shahr ki shab-tab mah-washo mat so

ye jalti-bujhti si yaadon ki kahkashan 'ishqi'

bikhar na jae ghazal hi koi kaho mat so