kuchh aur puchhiye ye haqiqat na puchhiye

kuchh aur pūchhiye ye haqīqat na pūchhiye

kyoñ mujh ko aap se hai mohabbat na pūchhiye

sajdoñ se tai maqām-e-mohabbat na ho sakā

kyā kyā huī hai sar ko nadāmat na pūchhiye

ka.abe meñ but-kade meñ harīm-e-jamāl meñ

dil kī kahāñ kahāñ hai zarūrat na pūchhiye

thī rāz-e-ibtidā-e-mohabbat bas ik nigah

aisī nigāh jis kī haqīqat na pūchhiye

kahne ko dil meñ kuchh bhī nahīñ juz ḳhayāl-e-yār

lekin ḳhayāl-e-yār kī vus.at na pūchhiye

donoñ hī bhuul jaane ke qābil haiñ ishq meñ

afsāna-e-majāz-o-haqīqat na pūchhiye

'taskīñ' ye jān-o-dil the hameñ bhī kabhī aziiz

ab zindagī hai kis kī badaulat na pūchhiye

kuchh aur puchhiye ye haqiqat na puchhiye

kyon mujh ko aap se hai mohabbat na puchhiye

sajdon se tai maqam-e-mohabbat na ho saka

kya kya hui hai sar ko nadamat na puchhiye

kabe mein but-kade mein harim-e-jamal mein

dil ki kahan kahan hai zarurat na puchhiye

thi raaz-e-ibtida-e-mohabbat bas ek nigah

aisi nigah jis ki haqiqat na puchhiye

kahne ko dil mein kuchh bhi nahin juz KHayal-e-yar

lekin KHayal-e-yar ki wusat na puchhiye

donon hi bhul jaane ke qabil hain ishq mein

afsana-e-majaz-o-haqiqat na puchhiye

'taskin' ye jaan-o-dil the hamein bhi kabhi aziz

ab zindagi hai kis ki badaulat na puchhiye