kuchh bad-gumaniyan hain kuchh bad-zabaniyan hain

kuchh bad-gumāniyāñ haiñ kuchh bad-zabāniyāñ haiñ

muddat se un kī ham par ye mehrbāniyāñ haiñ

aatā hai jab kisī par ruktā nahīñ hai hargiz

mānind-e-mauj-e-dariyā dil kī ravāniyāñ haiñ

paidā kahāñ haiñ hote ab 'zauq' aur 'ġhālib'

haañ 'dāġh' aur 'hālī' un kī nishāniyāñ haiñ

jo paas thā vo khoyā nām-e-salaf Duboyā

kyā ḳhaak apnī ai dil ab zindagāniyāñ haiñ

ai dil na chheḌ qissa ho dard jis se paidā

ye sher-ḳhvāniyāñ hai yā nauha-ḳhvāniyāñ haiñ

kyā ham ne ye nikālī tarz-e-ġhazal nirālī

kuchh guf-fishāniyāñ haiñ kuchh ḳhūñ-fishāniyāñ haiñ

bād-e-ḳhizāñ ne gulshan vīrāñ kiyā hai saarā

bulbul kī ab kahāñ vo rañgīñ-bayāniyāñ haiñ

jaur-o-jafā ke aise ham ho ga.e haiñ ḳhūgar

nā-meharbāniyāñ bhī ab mehrbāniyāñ haiñ

ai 'mashriqī' jahāñ meñ dekhā yahī tamāshā

kuchh mātam-o-alam hai kuchh shādmāniyāñ haiñ

kuchh bad-gumaniyan hain kuchh bad-zabaniyan hain

muddat se un ki hum par ye mehrbaniyan hain

aata hai jab kisi par rukta nahin hai hargiz

manind-e-mauj-e-dariya dil ki rawaniyan hain

paida kahan hain hote ab 'zauq' aur 'ghaalib'

han 'dagh' aur 'haali' un ki nishaniyan hain

jo pas tha wo khoya nam-e-salaf Duboya

kya KHak apni ai dil ab zindaganiyan hain

ai dil na chheD qissa ho dard jis se paida

ye sher-KHwaniyan hai ya nauha-KHwaniyan hain

kya hum ne ye nikali tarz-e-ghazal nirali

kuchh guf-fishaniyan hain kuchh KHun-fishaniyan hain

baad-e-KHizan ne gulshan viran kiya hai sara

bulbul ki ab kahan wo rangin-bayaniyan hain

jaur-o-jafa ke aise hum ho gae hain KHugar

na-meharbaniyan bhi ab mehrbaniyan hain

ai 'mashriqi' jahan mein dekha yahi tamasha

kuchh matam-o-alam hai kuchh shadmaniyan hain