kuchh batao to sahi ab ke tamasha kya hai

kuchh batāo to sahī ab ke tamāshā kyā hai

hoñT par taale lage sab ke tamāshā kyā hai

dil ke ik moḌ pe rahtā hai tamannā kā hujūm

jaane vaale to ga.e kab ke tamāshā kyā hai

zulm Dhaao yā banā Daalo mohabbat kā safīr

ham nahīñ rahte kahīñ dab ke tamāshā kyā hai

jis kī ḳhāmoshī se niklā hai sahar kā sūraj

ham musāfir haiñ usī shab ke tamāshā kyā hai

rañg maddham haiñ magar pyaar kī ḳhushbū na ga.ī

phuul taaza haiñ tirī chhab ke tamāshā kyā hai

dard ke saaz pe ham ne bhī ġhazal-ḳhvānī kī

giit likkhe haiñ tire lab ke tamāshā kyā hai

tum to duniyā ho badalnā hai vatīra terā

ham kahāñ bande tere Dhab ke tamāshā kyā hai

sirf tum hī to bulandī pe nahīñ ho taaro

ham bhī 'manzar' haiñ usī rab ke tamāshā kyā hai

kuchh batao to sahi ab ke tamasha kya hai

honT par tale lage sab ke tamasha kya hai

dil ke ek moD pe rahta hai tamanna ka hujum

jaane wale to gae kab ke tamasha kya hai

zulm Dhao ya bana Dalo mohabbat ka safir

hum nahin rahte kahin dab ke tamasha kya hai

jis ki KHamoshi se nikla hai sahar ka suraj

hum musafir hain usi shab ke tamasha kya hai

rang maddham hain magar pyar ki KHushbu na gai

phul taza hain teri chhab ke tamasha kya hai

dard ke saz pe hum ne bhi ghazal-KHwani ki

git likkhe hain tere lab ke tamasha kya hai

tum to duniya ho badalna hai watira tera

hum kahan bande tere Dhab ke tamasha kya hai

sirf tum hi to bulandi pe nahin ho taro

hum bhi 'manzar' hain usi rab ke tamasha kya hai