kuchh bhi na kahna kuchh bhi na sunna lafz mein lafz utarne dena

kuchh bhī na kahnā kuchh bhī na sunñā lafz meñ lafz utarne denā

miTTī kā ye pyāla apne āb-e-hayāt se bharne denā

maiñ bhī mahz ik jism nahīñ huuñ tum bhī mahz ik ruuh nahīñ ho

jism-o-rūh ke aks ko un ke ā.īne meñ utarne denā

apne jism ke ā.īne se har ḳhākī chilman ko haTā kar

sāmne baiThe rahnā mere ruuh ko merī sañvarne denā

sirf havā-e-mohabbat huuñ maiñ ā.ūñgā aur guzar jā.ūñgā

bas itnā karnā mujh ko apne andar se guzarne denā

aur kisī sāhil par jā kar ubharūñgā ek aur badan meñ

miTTī chhoḌ rahā huuñ maiñ mujh ko dariyā meñ utarne denā

tez havā-e-taġhāful ho tum maiñ huuñ gard-o-ġhubār-e-mohabbat

ḳhuub mazā aa.egā mujh ko sāmne apne bikharne denā

is 'ehsās' ko mat uljhānā kisī bhī bahs-e-fanā-o-baqā meñ

jiinā chāhe to jiine denā marnā chāhe to marne denā

kuchh bhi na kahna kuchh bhi na sunna lafz mein lafz utarne dena

miTTi ka ye pyala apne aab-e-hayat se bharne dena

main bhi mahz ek jism nahin hun tum bhi mahz ek ruh nahin ho

jism-o-ruh ke aks ko un ke aaine mein utarne dena

apne jism ke aaine se har KHaki chilman ko haTa kar

samne baiThe rahna mere ruh ko meri sanwarne dena

sirf hawa-e-mohabbat hun main aaunga aur guzar jaunga

bas itna karna mujh ko apne andar se guzarne dena

aur kisi sahil par ja kar ubharunga ek aur badan mein

miTTi chhoD raha hun main mujh ko dariya mein utarne dena

tez hawa-e-taghaful ho tum main hun gard-o-ghubar-e-mohabbat

KHub maza aaega mujh ko samne apne bikharne dena

is 'ehsas' ko mat uljhana kisi bhi bahs-e-fana-o-baqa mein

jina chahe to jine dena marna chahe to marne dena