kuchh bol guftugu ka saliqa na bhul jae

kuchh bol guftugū kā salīqa na bhuul jaa.e

shīshe ke ghar meñ tujh ko bhī rahnā na bhuul jaa.e

vā rakh sadā darīcha-e-ḳhud-āgahī ki tū

achchhe to kyā buroñ ko parakhnā na bhuul jaa.e

zaḳhm-e-nihāñ ko shauq-e-talab se judā na kar

hotā hai roz o shab jo tamāshā na bhuul jaa.e

kar deñ na be-talab ye musalsal aziyyateñ

dil bhī kahīñ vafā kā salīqa na bhuul jaa.e

manzil kā nashsha qurbat-e-manzil na chhīn le

apnī galī meñ aa ke hī rasta na bhuul jaa.e

mat rakh tazād-e-zāhir-o-bātin ki aadmī

tujh ko tire amal se parakhnā na bhuul jaa.e

vo bhiiḌ hai ki shahr meñ chalnā muhāl hai

uñglī pakaḌnā baap kī bachcha na bhuul jaa.e

'nāhīd' rif.ateñ to mileñgī bahut magar

āñkhoñ ko apne shahr kā naqsha na bhuul jaa.e

kuchh bol guftugu ka saliqa na bhul jae

shishe ke ghar mein tujh ko bhi rahna na bhul jae

wa rakh sada daricha-e-KHud-agahi ki tu

achchhe to kya buron ko parakhna na bhul jae

zaKHm-e-nihan ko shauq-e-talab se juda na kar

hota hai roz o shab jo tamasha na bhul jae

kar den na be-talab ye musalsal aziyyaten

dil bhi kahin wafa ka saliqa na bhul jae

manzil ka nashsha qurbat-e-manzil na chhin le

apni gali mein aa ke hi rasta na bhul jae

mat rakh tazad-e-zahir-o-baatin ki aadmi

tujh ko tere amal se parakhna na bhul jae

wo bhiD hai ki shahr mein chalna muhaal hai

ungli pakaDna bap ki bachcha na bhul jae

'nahid' rifaten to milengi bahut magar

aankhon ko apne shahr ka naqsha na bhul jae