kuchh chakhane ko uske mal to ho

kuchh chakhāne ko us ke maal to ho

na ho sālan chane kī daal to ho

bazm-e-zindāñ meñ laao zāhid ko

paas sheroñ ke ik shaġhāl to ho

bhejūñ us naujavāñ ke paas kise

koī mashshāta pīr-e-zāl to ho

apne qāsid ko kyā maiñ ḳhil.at duuñ

go do-shāla na ho to shawl to ho

ek do ḳhum se hogā kyā saaqī

mere piine ko ik pakhāl to ho

ghar meñ apne maiñ Daal luuñ un ko

par mire paas maal Taal to ho

mere khāne ko sūkhe TukḌe hoñ

un ke khāne ko shīrmāl to ho

holī vo khelne ko aate haiñ

kuchh na milne ko ho gulāl to ho

lambe bāloñ pe jab maiñ āshiq huuñ

merī chañdiyā meñ ek baal to ho

shaiḳh jī ke junūñ kā jab ho ilaaj

qasd ke vāste kudāl to ho

kis tarah kaate nā.ika charḳha

sūkhī chamraḳh na ho to maal to ho

vajd kartā huuñ un kī mahfil meñ

taaki ma.alūm merā haal to ho

un kā pīchhā maiñ jab karūñ yaaro

pahle mujh meñ koī kamāl to ho

nashsha paanī kare 'ināyat' kyā

bhang vaalā na ho kalāl to ho

kuchh chakhane ko us ke mal to ho

na ho salan chane ki dal to ho

bazm-e-zindan mein lao zahid ko

pas sheron ke ek shaghaal to ho

bhejun us naujawan ke pas kise

koi mashshata pir-e-zal to ho

apne qasid ko kya main KHilat dun

go do-shaala na ho to shawl to ho

ek do KHum se hoga kya saqi

mere pine ko ek pakhaal to ho

ghar mein apne main Dal lun un ko

par mere pas mal Tal to ho

mere khane ko sukhe TukDe hon

un ke khane ko shirmal to ho

holi wo khelne ko aate hain

kuchh na milne ko ho gulal to ho

lambe baalon pe jab main aashiq hun

meri chandiya mein ek baal to ho

shaiKH ji ke junun ka jab ho ilaj

qasd ke waste kudal to ho

kis tarah kate naika charKHa

sukhi chamraKH na ho to mal to ho

wajd karta hun un ki mahfil mein

taki malum mera haal to ho

un ka pichha main jab karun yaro

pahle mujh mein koi kamal to ho

nashsha pani kare 'inayat' kya

bhang wala na ho kalal to ho