kuchh chamakta sa tah-e-ab nazar to aae

kuchh chamaktā sā tah-e-āb nazar to aa.e

Dūbne ke liye girdāb nazar to aa.e

koī ta.abīr kī sūrat bhī nikal aa.egī

niiñd to aa.e kabhī ḳhvāb nazar to aa.e

band kamre kī fazā kis ko bhalī lagtī hai

mere atrāf meñ mahtāb nazar to aa.e

do ghaḌī Thahrūñ kahīñ maiñ bhī zarā dam le luuñ

raah meñ ḳhitta-e-shādāb nazar to aa.e

maiñ shikasta huuñ idhar tū bhī shikasta hai udhar

jañg meñ koī zafar-yāb nazar to aa.e

mushkileñ gher ke baiThī haiñ mirā ghar 'ālam'

ab zarā halqa-e-ahbāb nazar to aa.e

kuchh chamakta sa tah-e-ab nazar to aae

Dubne ke liye girdab nazar to aae

koi tabir ki surat bhi nikal aaegi

nind to aae kabhi KHwab nazar to aae

band kamre ki faza kis ko bhali lagti hai

mere atraf mein mahtab nazar to aae

do ghaDi Thahrun kahin main bhi zara dam le lun

rah mein KHitta-e-shadab nazar to aae

main shikasta hun idhar tu bhi shikasta hai udhar

jang mein koi zafar-yab nazar to aae

mushkilen gher ke baiThi hain mera ghar 'alam'

ab zara halqa-e-ahbab nazar to aae