kuchh dard jagae rakhte hain kuchh KHwab sajae rakhte hain

kuchh dard jagā.e rakhte haiñ kuchh ḳhvāb sajā.e rakhte haiñ

is dil ke sahāre jīvan meñ ham baat banā.e rakhte haiñ

aise bhī marāhil aate haiñ is manzil-e-ishq kī rāhoñ meñ

jab ashk bahāte haiñ ḳhud bhī us ko bhī rulā.e rakhte haiñ

kyā us se kaheñ aur kaise kaheñ un rañg badaltī āñkhoñ se

kyā shauq umaDte haiñ dil meñ kyā vahm satā.e rakhte haiñ

ik baat pe aa kar aaj hameñ iqrār ye us se karnā paḌā

kab yaad nahīñ karte us ko kab us ko bhulā.e rakhte haiñ

sad-rañg nazāre the jis meñ vo dil kā chaman kyā tum se kaheñ

kyuuñ us ko ujaaḌ ke baiThe haiñ kyuuñ ḳhaak uḌaa.e rakhte haiñ

muhtāj nahīñ hai kisht-e-jāñ mausam ke badalte dhāroñ kī

kuchh daaġh to dil meñ be-mausam sau phuul khilā.e rakhte haiñ

āshiq bhī nahīñ sādhū bhī nahīñ phir raaz hai kyā ye 'mirzā'-jī

kis aañch se dahkā hai siina kyā aag jalā.e rakhte haiñ

kuchh dard jagae rakhte hain kuchh KHwab sajae rakhte hain

is dil ke sahaare jiwan mein hum baat banae rakhte hain

aise bhi marahil aate hain is manzil-e-ishq ki rahon mein

jab ashk bahate hain KHud bhi us ko bhi rulae rakhte hain

kya us se kahen aur kaise kahen un rang badalti aankhon se

kya shauq umaDte hain dil mein kya wahm satae rakhte hain

ek baat pe aa kar aaj hamein iqrar ye us se karna paDa

kab yaad nahin karte us ko kab us ko bhulae rakhte hain

sad-rang nazare the jis mein wo dil ka chaman kya tum se kahen

kyun us ko ujaD ke baiThe hain kyun KHak uDae rakhte hain

muhtaj nahin hai kisht-e-jaan mausam ke badalte dhaaron ki

kuchh dagh to dil mein be-mausam sau phul khilae rakhte hain

aashiq bhi nahin sadhu bhi nahin phir raaz hai kya ye 'mirza'-ji

kis aanch se dahka hai sina kya aag jalae rakhte hain