kuchh dil-nashin yaaden bhi hain kuchh dard ka rishta bhi hai

kuchh dil-nashīñ yādeñ bhī haiñ kuchh dard kā rishta bhī hai

maiñ kis tarah bhūloñ use vo umr kā hissa bhī hai

ġham meñ ḳhushī kī lahr kyoñ āsūdgī meñ zahr kyoñ

is soch meñ dariyā bhī hai is fikr meñ sahrā bhī hai

vo vahm kī tahrīr hai vo ḳhvāb kī tasvīr hai

maiñ ne use dekhā nahīñ maiñ ne use dekhā bhī hai

kab tak maiñ apne aap se laḌtā rahūñ laḌtā rahūñ

maiñ āḳhirash insān huuñ insān to thaktā bhī hai

nafrat kisī kī yaad se vahshat ḳhud apne aap se

vaise to yuuñ hotā nahīñ lekin kabhī hotā bhī hai

ab to 'samīr' is dasht meñ rahnā hai mujh ko umr bhar

ye āḳhirī manzil nahīñ ye āḳhirī rasta bhī hai

kuchh dil-nashin yaaden bhi hain kuchh dard ka rishta bhi hai

main kis tarah bhulon use wo umr ka hissa bhi hai

gham mein KHushi ki lahr kyon aasudgi mein zahr kyon

is soch mein dariya bhi hai is fikr mein sahra bhi hai

wo wahm ki tahrir hai wo KHwab ki taswir hai

main ne use dekha nahin main ne use dekha bhi hai

kab tak main apne aap se laDta rahun laDta rahun

main aaKHirash insan hun insan to thakta bhi hai

nafrat kisi ki yaad se wahshat KHud apne aap se

waise to yun hota nahin lekin kabhi hota bhi hai

ab to 'samir' is dasht mein rahna hai mujh ko umr bhar

ye aaKHiri manzil nahin ye aaKHiri rasta bhi hai