kuchh din to kar taawun ai KHush-sifat mujhse

kuchh din to kar ta.āvun ai ḳhush-sifāt mujh se

tanhā na ho sakegī tat.hīr-e-zāt mujh se

fariyād ai samā.at insāf ai farāsat

karte haiñ ahl-e-duniyā duniyā kī baat mujh se

hairān huuñ ki us tak kis kis jihat se pahuñchūñ

āvārgī-talab haiñ sad-hā jihāt mujh se

kyuuñ ai hayāt-e-rafta roke hue hai rasta

kyā chāhtī hai āḳhir ai be-sabāt mujh se

yūnān ke saḳhī to talḳhāb nazr kar deñ

paanī aziiz rakkheñ ahl-e-furāt mujh se

gardish meñ haiñ sitāre hai koī jo pukāre

aa ai ġharīb-e-kūcha le jā zakāt mujh se

vā hai darīcha-e-dil ik chīḳh ban ke dar aa

sargoshiyāñ kahāñ tak ai sard raat mujh se

kuchh din to kar taawun ai KHush-sifat mujh se

tanha na ho sakegi tathir-e-zat mujh se

fariyaad ai samaat insaf ai farasat

karte hain ahl-e-duniya duniya ki baat mujh se

hairan hun ki us tak kis kis jihat se pahunchun

aawargi-talab hain sad-ha jihat mujh se

kyun ai hayat-e-rafta roke hue hai rasta

kya chahti hai aaKHir ai be-sabaat mujh se

yunan ke saKHi to talKHab nazr kar den

pani aziz rakkhen ahl-e-furaat mujh se

gardish mein hain sitare hai koi jo pukare

aa ai gharib-e-kucha le ja zakat mujh se

wa hai daricha-e-dil ek chiKH ban ke dar aa

sargoshiyan kahan tak ai sard raat mujh se