kuchh dinon se hansi ki zad mein hai

kuchh dinoñ se hañsī kī zad meñ hai

dil-e-ġham bebasī kī zad meñ hai

zindagī kā tumheñ batā.eñ kyā

zindagī zindagī kī zad meñ hai

pyaas sī kyā hai ye darūn-e-jāñ

ruuh kis tishnagī kī zad meñ hai

muddatoñ se bahut udaas hai dil

jaane ye kis kamī kī zad meñ hai

chārāgar aaj dil kā haal na pūchh

aaj dil be-dilī kī zad meñ hai

mujh ko mat ham-safar banā ki mirī

zaat āvārgī kī zad meñ hai

ye mirā haal jo sañvartā nahīñ

ye tirī be-ruḳhī kī zad meñ hai

har kisī meñ hai shor ik barpā

har koī ḳhāmushī kī zad meñ hai

jaane ab kis tarah kaTe 'abbās'

zindagī rah-ravī kī zad meñ hai

kuchh dinon se hansi ki zad mein hai

dil-e-gham bebasi ki zad mein hai

zindagi ka tumhein bataen kya

zindagi zindagi ki zad mein hai

pyas si kya hai ye darun-e-jaan

ruh kis tishnagi ki zad mein hai

muddaton se bahut udas hai dil

jaane ye kis kami ki zad mein hai

chaaragar aaj dil ka haal na puchh

aaj dil be-dili ki zad mein hai

mujh ko mat ham-safar bana ki meri

zat aawargi ki zad mein hai

ye mera haal jo sanwarta nahin

ye teri be-ruKHi ki zad mein hai

har kisi mein hai shor ek barpa

har koi KHamushi ki zad mein hai

jaane ab kis tarah kaTe 'abbas'

zindagi rah-rawi ki zad mein hai