kuchh gham-e-zist ke aalam abhi baqi hain

kuchh ġham-e-zīst ke ālām abhī baaqī haiñ

zindagī tere liye kaam abhī baaqī haiñ

jin se vābasta hai shohrat tire mai-ḳhāne kī

aise TuuTe hue kuchh jaam abhī baaqī haiñ

shab kī tārīkī ne duniyā kī bahāreñ lūTīñ

āshnā-e-sahar-o-shām abhī baaqī haiñ

ham ne sayyād ko gulshan se nikālā hai magar

chār-sū phaile hue daam abhī baaqī haiñ

ḳhaar gulshan se nikāle ga.e lekin vo gul

jin se gulshan huā badnām abhī baaqī haiñ

kab idhar uTThegī tū ai nigah-e-shauq batā

kitne paiġhām tire naam abhī baaqī haiñ

ruk gayā aa ke kahāñ rāh-e-talab meñ 'anjum'

pa.e-manzil tire do-gām abhī baaqī haiñ

kuchh gham-e-zist ke aalam abhi baqi hain

zindagi tere liye kaam abhi baqi hain

jin se wabasta hai shohrat tere mai-KHane ki

aise TuTe hue kuchh jam abhi baqi hain

shab ki tariki ne duniya ki bahaaren luTin

aashna-e-sahar-o-sham abhi baqi hain

hum ne sayyaad ko gulshan se nikala hai magar

chaar-su phaile hue dam abhi baqi hain

KHar gulshan se nikale gae lekin wo gul

jin se gulshan hua badnam abhi baqi hain

kab idhar uTThegi tu ai nigah-e-shauq bata

kitne paigham tere nam abhi baqi hain

ruk gaya aa ke kahan rah-e-talab mein 'anjum'

pae-manzil tere do-gam abhi baqi hain