kuchh gham ka gham hua na KHushi ki KHushi hui

kuchh ġham kā ġham huā na ḳhushī kī ḳhushī huī

kis rāhat-o-sukūñ se basar zindagī huī

us be-navā gadā ko shahanshāh jāniye

jis ko nasīb daulat-e-dīvāngī huī

kaise shab-e-firāq kaTī kuchh na pūchhiye

ik dāstāñ hai ranj-o-alam se bharī huī

sajde ko sar jhukā diyā apne hī paañv par

mujh ko jab apnī zaat se kuchh āgahī huī

ḳhud apne husn kī bhī na vo taab lā sakā

jis aadmī ke qalb meñ kuchh raushnī huī

saaqī tire karam kī to kuchh intihā nahīñ

ye aur baat kam na mirī tishnagī huī

furqat meñ bhī nasīb hai mujh ko nashāt-e-qurb

dil meñ kisī kī yaad hai aisī basī huī

'sābir' zabāñ pe harf-e-shikāyat na lā sakā

us kī sarisht meñ hai qanā'at bharī huī

kuchh gham ka gham hua na KHushi ki KHushi hui

kis rahat-o-sukun se basar zindagi hui

us be-nawa gada ko shahanshah jaaniye

jis ko nasib daulat-e-diwangi hui

kaise shab-e-firaq kaTi kuchh na puchhiye

ek dastan hai ranj-o-alam se bhari hui

sajde ko sar jhuka diya apne hi panw par

mujh ko jab apni zat se kuchh aagahi hui

KHud apne husn ki bhi na wo tab la saka

jis aadmi ke qalb mein kuchh raushni hui

saqi tere karam ki to kuchh intiha nahin

ye aur baat kam na meri tishnagi hui

furqat mein bhi nasib hai mujh ko nashat-e-qurb

dil mein kisi ki yaad hai aisi basi hui

'sabir' zaban pe harf-e-shikayat na la saka

us ki sarisht mein hai qana'at bhari hui