kuchh hababon ka silsila the hum

kuchh habāboñ kā silsila the ham

kis tamannā kā aa.ina the ham

tum se mil kar samajh meñ aaya hai

aaj tak ḳhud se bhī judā the ham

dil kī sarhad pe jo farozāñ the

un charāġhoñ kā aasrā the ham

dhund meñ Dūbte jazīroñ kī

os khaa.ī huī havā the ham

ḳhud añdheroñ ke saath chalte the

aur sab ke liye diyā the ham

'aks-e-āvāz jis meñ aa.e nazar

aisā shaffāf aa.ina the ham

chal rahe the to qāfila the 'shakīl'

ruk ke dekhā to naqsh-e-pā the ham

kuchh hababon ka silsila the hum

kis tamanna ka aaina the hum

tum se mil kar samajh mein aaya hai

aaj tak KHud se bhi juda the hum

dil ki sarhad pe jo farozan the

un charaghon ka aasra the hum

dhund mein Dubte jaziron ki

os khai hui hawa the hum

KHud andheron ke sath chalte the

aur sab ke liye diya the hum

'aks-e-awaz jis mein aae nazar

aisa shaffaf aaina the hum

chal rahe the to qafila the 'shakil'

ruk ke dekha to naqsh-e-pa the hum