kuchh is ada se gham-e-zindagi ke sath chale

kuchh is adā se ġham-e-zindagī ke saath chale

ki jaise koī kisī ajnabī ke saath chale

qadam qadam ġham-e-kaun-o-makāñ bhulā.e hue

jo mere saath chale vo ḳhushī ke saath chale

ḳhirad ko rāh-ravī kā shu'ūr aa jaa.e

zarā sī duur vo dīvāngī ke saath chale

jo ham-safar nahīñ koī to apnā saaya hai

ye aasrā to hai jaise kisī ke saath chale

surūr-o-kaif kī rāheñ bahut hī nāzuk haiñ

unhīñ kā zikr zarā mai-kashī ke saath chale

rah-e-hayāt meñ vo tajrabe hue haiñ ki bas

har ek soch-samajh kar kisī ke saath chale

ḳhayāl apnā to ye hai ki dāstān-e-hayāt

'ra.īs' kuchh bhī ho zinda-dilī ke saath chale

kuchh is ada se gham-e-zindagi ke sath chale

ki jaise koi kisi ajnabi ke sath chale

qadam qadam gham-e-kaun-o-makan bhulae hue

jo mere sath chale wo KHushi ke sath chale

KHirad ko rah-rawi ka shu'ur aa jae

zara si dur wo diwangi ke sath chale

jo ham-safar nahin koi to apna saya hai

ye aasra to hai jaise kisi ke sath chale

surur-o-kaif ki rahen bahut hi nazuk hain

unhin ka zikr zara mai-kashi ke sath chale

rah-e-hayat mein wo tajrabe hue hain ki bas

har ek soch-samajh kar kisi ke sath chale

KHayal apna to ye hai ki dastan-e-hayat

'rais' kuchh bhi ho zinda-dili ke sath chale