kuchh is qadar main KHirad ke asar mein aa gaya hun

kuchh is qadar maiñ ḳhirad ke asar meñ aa gayā huuñ

simaT ke saarā kā saarā hī sar meñ aa gayā huuñ

zamīñ uchhāl chukī āsmāñ ne thāmā nahīñ

maiñ kā.enāt meñ bilkul adhar meñ aa gayā huuñ

ye zindagī bhī mire hausloñ pe hairāñ hai

samajh rahī thī ki maiñ us ke Dar meñ aa gayā huuñ

zarā sā fāsla maiñ ne bhī tai kiyā to hai

agar se do qadam aage magar maiñ aa gayā huuñ

mirī shanāḳht kī ḳhātir chhapī mirī tasvīr

na jīte-jī sahī mar ke ḳhabar meñ aa gayā huuñ

udaas ho gayā huuñ phir se ik zarā hañs kar

meñ ghūm-ghām ke phir apne ghar meñ aa gayā huuñ

na aa sakā maiñ tire haath kī lakīroñ meñ

yahī bahut hai tirī chashm-e-tar meñ aa gayā huuñ

ye soch kar ki na duuñ nāḳhudā ko ye zahmat

utar ke kashtī se ḳhud hī bhañvar meñ aa gayā huuñ

chhupā na paayā kabhī ḳhud ko apne sheroñ meñ

maiñ jo huuñ jaisā huuñ apne hunar meñ aa gayā huuñ

kuchh is qadar main KHirad ke asar mein aa gaya hun

simaT ke sara ka sara hi sar mein aa gaya hun

zamin uchhaal chuki aasman ne thama nahin

main kaenat mein bilkul adhar mein aa gaya hun

ye zindagi bhi mere hauslon pe hairan hai

samajh rahi thi ki main us ke Dar mein aa gaya hun

zara sa fasla main ne bhi tai kiya to hai

agar se do qadam aage magar main aa gaya hun

meri shanaKHt ki KHatir chhapi meri taswir

na jite-ji sahi mar ke KHabar mein aa gaya hun

udas ho gaya hun phir se ek zara hans kar

mein ghum-gham ke phir apne ghar mein aa gaya hun

na aa saka main tere hath ki lakiron mein

yahi bahut hai teri chashm-e-tar mein aa gaya hun

ye soch kar ki na dun naKHuda ko ye zahmat

utar ke kashti se KHud hi bhanwar mein aa gaya hun

chhupa na paya kabhi KHud ko apne sheron mein

main jo hun jaisa hun apne hunar mein aa gaya hun