kuchh is qadar tawil tha wo daur intizar ka

kuchh is qadar tavīl thā vo daur intizār kā

ki rafta rafta bujh gayā charāġh dil meñ pyaar kā

chaman meñ mustaqil rahā ḳhizāñ kā daur yuuñ ki phir

ye dil hī muntazir nahīñ rahā kisī bahār kā

na ab vo rahguzar rahī na vo safar na ham-safar

magar hai dil pe aaj bhī asar usī ḳhumār kā

yaqīn kar liyā thā maiñ ne us pe aañkh muuñd kar

bas ik yahī to thā qusūr mujh gunāhgār kā

na ḳhushbueñ guloñ kī ab na sā.ebān kā pata

na jaane kab talak chale safar ye regzār kā

thī zindagī chaḌhāv par to muḳhtasar lagā safar

magar lagā tavīl ḳhuub rāsta utaar kā

na de sakegā kuchh tumheñ sivā.e dard-e-dil ke ye

to kyoñ uThā ke chal rahe ho bojh ye ġhubār kā

kuchh is qadar tawil tha wo daur intizar ka

ki rafta rafta bujh gaya charagh dil mein pyar ka

chaman mein mustaqil raha KHizan ka daur yun ki phir

ye dil hi muntazir nahin raha kisi bahaar ka

na ab wo rahguzar rahi na wo safar na ham-safar

magar hai dil pe aaj bhi asar usi KHumar ka

yaqin kar liya tha main ne us pe aankh mund kar

bas ek yahi to tha qusur mujh gunahgar ka

na KHushbuen gulon ki ab na saeban ka pata

na jaane kab talak chale safar ye regzar ka

thi zindagi chaDhaw par to muKHtasar laga safar

magar laga tawil KHub rasta utar ka

na de sakega kuchh tumhein siwae dard-e-dil ke ye

to kyon uTha ke chal rahe ho bojh ye ghubar ka