kuchh is tarah se guzari hai zindagi maine

kuchh is tarah se guzārī hai zindagī maiñ ne

har ek saañs ko samjhā hai āḳhirī maiñ ne

samajh gayā vahīñ rāz-e-visāl jab dekhā

habāb terā ma.āl-e-shikastagī maiñ ne

karishma-e-mai-e-tauhīd ai ta.āl-allāh

surūr hai mire saaqī ko aur pī maiñ ne

lagā ke un kī mohabbat meñ jaan kī baazī

tamām daulat-e-kaunain jiit lī maiñ ne

kisī kā raaz samajhtā gayā jahāñ tak bhī

samajh meñ aayā ki samjhā na kuchh abhī maiñ ne

anā zabāñ se na kahte na daar par khiñchte

kiyā hai qahr ye mansūr aap kī maiñ ne

hai māvārā-e-suḳhan 'barq' guftugū merī

ḳhamosh rah ke bhī aksar hai baat kī maiñ ne

kuchh is tarah se guzari hai zindagi main ne

har ek sans ko samjha hai aaKHiri main ne

samajh gaya wahin raaz-e-visal jab dekha

habab tera maal-e-shikastagi main ne

karishma-e-mai-e-tauhid ai taal-allah

surur hai mere saqi ko aur pi main ne

laga ke un ki mohabbat mein jaan ki bazi

tamam daulat-e-kaunain jit li main ne

kisi ka raaz samajhta gaya jahan tak bhi

samajh mein aaya ki samjha na kuchh abhi main ne

ana zaban se na kahte na dar par khinchte

kiya hai qahr ye mansur aap ki main ne

hai mawara-e-suKHan 'barq' guftugu meri

KHamosh rah ke bhi aksar hai baat ki main ne