kuchh is tarah wo nigahen churae jate hain

kuchh is tarah vo nigāheñ churā.e jaate haiñ

ki aur bhī mire nazdīk aa.e jaate haiñ

is iltifāt-e-gurezāñ ko naam kyā diije

javāb dete nahīñ muskurā.e jaate haiñ

nigāh-e-lutf se dekho na ahl-e-dil kī taraf

diloñ ke raaz zabānoñ pe aa.e jaate haiñ

vo jin se tark-e-ta.alluq ko ik zamāna huā

na jaane aaj vo kyuuñ yaad aa.e jaate haiñ

tumhārī bazm kī kuchh aur baat hai varna

ham aise log kahīñ bin bulā.e jaate haiñ

ye dil ke zaḳhm bhī kitne ajiib haiñ ai shams'

bahār ho ki ḳhizāñ muskurā.e jaate haiñ

kuchh is tarah wo nigahen churae jate hain

ki aur bhi mere nazdik aae jate hain

is iltifat-e-gurezan ko nam kya dije

jawab dete nahin muskurae jate hain

nigah-e-lutf se dekho na ahl-e-dil ki taraf

dilon ke raaz zabanon pe aae jate hain

wo jin se tark-e-talluq ko ek zamana hua

na jaane aaj wo kyun yaad aae jate hain

tumhaari bazm ki kuchh aur baat hai warna

hum aise log kahin bin bulae jate hain

ye dil ke zaKHm bhi kitne ajib hain ai shams'

bahaar ho ki KHizan muskurae jate hain