kuchh jaeza to lijiye apne bayan ka

kuchh jā.eza to lījiye apne bayān kā

tum se to mere dost ta'alluq hai maan kā

vo ḳhud to raushnī ke safar pe ravāñ hai aur

mujh ko pata diyā hai qadīmī makān kā

barsoñ ke kār-e-ḳhair kā phal mil gayā mujhe

naqsha milā hai mujh ko bhī sone kī kaan kā

ye ishq kā safar hai so is par ravāñ raho

kyā is meñ infirād hai pīr-o-javān kā

ye be-muravvatī ke tamāñchoñ kā daur hai

lagtā nahīñ hai koī mujhe is jahān kā

kahtā hai maiñ ne hijr se lazzat kashīd kī

ik baar muñh to dekhiye is ḳhush-gumān kā

TuuTe hue diloñ kā jo marham na ban sake

kyā fā.eda hai aise kisī bhī giyān kā

vo phuul dastaras meñ kisī shaḳhs ke nahīñ

is meñ bhalā qusūr hī kyā bāġhbān kā

ik baar zindagī meñ kabhī dekhnā zarūr

miTTī se lais jism kisī bhī kisān kā

toḌe baġhair maiñ ne palaTnā nahīñ 'razā'

chauḌā ho chāhe jitnā bhī siina chaTān kā

kuchh jaeza to lijiye apne bayan ka

tum se to mere dost ta'alluq hai man ka

wo KHud to raushni ke safar pe rawan hai aur

mujh ko pata diya hai qadimi makan ka

barson ke kar-e-KHair ka phal mil gaya mujhe

naqsha mila hai mujh ko bhi sone ki kan ka

ye ishq ka safar hai so is par rawan raho

kya is mein infirad hai pir-o-jawan ka

ye be-murawwati ke tamanchon ka daur hai

lagta nahin hai koi mujhe is jahan ka

kahta hai main ne hijr se lazzat kashid ki

ek bar munh to dekhiye is KHush-guman ka

TuTe hue dilon ka jo marham na ban sake

kya faeda hai aise kisi bhi giyan ka

wo phul dastaras mein kisi shaKHs ke nahin

is mein bhala qusur hi kya baghban ka

ek bar zindagi mein kabhi dekhna zarur

miTTi se lais jism kisi bhi kisan ka

toDe baghair main ne palaTna nahin 'raza'

chauDa ho chahe jitna bhi sina chaTan ka