kuchh KHak-e-rahguzar the kuchh dagh-dar the

kuchh ḳhāk-e-rahguzār the kuchh dāġh-dār the

mere chaman ke phuul shahīd-e-bahār the

manzil kaḌī thī pesh-e-nazar aur ham-safar

ḳhush the ki zer-e-sāya-e-dīvār-e-yār the

iimā hī thā ye chashm-e-dil-āvez-e-yār kā

ham ramz-ḳhvān-e-gardish-e-lail-o-nahār the

Darte na the darāzī-e-shām-e-firāq se

ham rāz-dār-e-silsila-e-zulf-e-yār the

ham jānte the ḳhūn-e-shahīdāñ kā mājrā

ham nukta-dān-e-ġhāza-e-rū-e-nigār the

phūloñ se ham-kalām the kāñToñ ke ham-zabāñ

dekho hameñ ki mahram-e-fasl-e-bahār the

ye turfa mājrā hai ki uḌtī thī dil meñ ḳhaak

phir bhī yahāñ nishān-e-kaf-e-pā-e-yār the

kartā hai iḳhtiyār ġham-e-yār bhī ye ruup

ham shaad the ki rehn-e-ġham-e-rozgār the

imsāl mauj-e-gul hī na thī zīnat-e-chaman

sailāb-e-ḳhūñ bhī ġhāza-e-rū-e-bahār the

aaya koī chaman meñ sunahrī qafas liye

kuchh naġhma-gar tuyūr sar-e-shāḳh-sār the

ham vahshiyoñ ne sehn-e-gulistāñ se ai ḳhizāñ

tinke bhī chun liye ki sharīk-e-bahār the

'ābid' zalīl-o-ḳhvār thī rasm-e-navā-garī

naġhme hameñ bhī nok-e-zabāñ be-shumār the

kuchh KHak-e-rahguzar the kuchh dagh-dar the

mere chaman ke phul shahid-e-bahaar the

manzil kaDi thi pesh-e-nazar aur ham-safar

KHush the ki zer-e-saya-e-diwar-e-yar the

ima hi tha ye chashm-e-dil-awez-e-yar ka

hum ramz-KHwan-e-gardish-e-lail-o-nahaar the

Darte na the daraazi-e-sham-e-firaq se

hum raaz-dar-e-silsila-e-zulf-e-yar the

hum jaante the KHun-e-shahidan ka majra

hum nukta-dan-e-ghaza-e-ru-e-nigar the

phulon se ham-kalam the kanTon ke ham-zaban

dekho hamein ki mahram-e-fasl-e-bahaar the

ye turfa majra hai ki uDti thi dil mein KHak

phir bhi yahan nishan-e-kaf-e-pa-e-yar the

karta hai iKHtiyar gham-e-yar bhi ye rup

hum shad the ki rehn-e-gham-e-rozgar the

imsal mauj-e-gul hi na thi zinat-e-chaman

sailab-e-KHun bhi ghaza-e-ru-e-bahaar the

aaya koi chaman mein sunahri qafas liye

kuchh naghma-gar tuyur sar-e-shaKH-sar the

hum wahshiyon ne sehn-e-gulistan se ai KHizan

tinke bhi chun liye ki sharik-e-bahaar the

'abid' zalil-o-KHwar thi rasm-e-nawa-gari

naghme hamein bhi nok-e-zaban be-shumar the