kuchh KHwab adhure se aankhon mein saja rakhna

kuchh ḳhvāb adhūre se āñkhoñ meñ sajā rakhnā

tārīk gharoñdoñ meñ jugnū hī jalā rakhnā

pahroñ kisī chehre par kuchh rang sajāne ko

ḳhushbū kī ḳhabar rakhnā phūloñ kā pata rakhnā

vahmoñ kī ridā oḌhe gumnām vo phirtā hai

be-ḳhvāb makānoñ kā darvāza khulā rakhnā

sunsān jazīroñ ke bhīge hue sāhil par

tum chāñd kī kirnoñ se ik naam likhā rakhnā

ubhrī kaf-e-jānāñ par zanjīr lahū kī hai

kuchh der sahī us ko pāband-e-hinā rakhnā

yāroñ ke hujūm andar tanhā.ī se ghabrānā

tanhā.ī ke sahrā meñ ik shahr basā rakhnā

jab mom kā paikar hai ye jism 'razī' apnā

phir dhuup kī chādar meñ kyā ḳhud ko chhupā rakhnā

kuchh KHwab adhure se aankhon mein saja rakhna

tarik gharondon mein jugnu hi jala rakhna

pahron kisi chehre par kuchh rang sajaane ko

KHushbu ki KHabar rakhna phulon ka pata rakhna

wahmon ki rida oDhe gumnam wo phirta hai

be-KHwab makanon ka darwaza khula rakhna

sunsan jaziron ke bhige hue sahil par

tum chand ki kirnon se ek nam likha rakhna

ubhri kaf-e-jaanan par zanjir lahu ki hai

kuchh der sahi us ko paband-e-hina rakhna

yaron ke hujum andar tanhai se ghabrana

tanhai ke sahra mein ek shahr basa rakhna

jab mom ka paikar hai ye jism 'razi' apna

phir dhup ki chadar mein kya KHud ko chhupa rakhna