kuchh log to itni bhi murawwat nahin karte

kuchh log to itnī bhī muravvat nahīñ karte

milne kī kabhī ḳhud se bhī zahmat nahīñ karte

is baar to raste bhī mujhe rok rahe haiñ

dīvār-o-dar-o-bām hī ulfat nahīñ karte

bāzār meñ ab kaun ḳharīdār hai apnā

itnī bhī ziyāda abhī qīmat nahīñ karte

kyā hogā sar-e-shām jo ham hoñge na ghar meñ

ye soch ke ham shahr se hijrat nahīñ karte

kahte haiñ faqīroñ kī fazīlat pe qasā.ed

ham aaj bhī hukkām kī bai.at nahīñ karte

sajdoñ ke evaz ḳhuld-e-barīñ māñgne vaalo

kyuuñ apne makānoñ ko hī jannat nahīñ karte

chhup jaate haiñ āġhosh meñ sūraj kī hamesha

ye chāñd-sitāre kabhī rehlat nahīñ karte

sūkhe hue peḌoñ pe koī phuul nahīñ hai

kyuuñ in se parinde bhī mohabbat nahīñ karte

dīvār to uThtī huī dekheñge gharoñ meñ

vo log jo bachchoñ ko nasīhat nahīñ karte

kuchh log to itni bhi murawwat nahin karte

milne ki kabhi KHud se bhi zahmat nahin karte

is bar to raste bhi mujhe rok rahe hain

diwar-o-dar-o-baam hi ulfat nahin karte

bazar mein ab kaun KHaridar hai apna

itni bhi ziyaada abhi qimat nahin karte

kya hoga sar-e-sham jo hum honge na ghar mein

ye soch ke hum shahr se hijrat nahin karte

kahte hain faqiron ki fazilat pe qasaed

hum aaj bhi hukkaam ki baiat nahin karte

sajdon ke ewaz KHuld-e-barin mangne walo

kyun apne makanon ko hi jannat nahin karte

chhup jate hain aaghosh mein suraj ki hamesha

ye chand-sitare kabhi rehlat nahin karte

sukhe hue peDon pe koi phul nahin hai

kyun in se parinde bhi mohabbat nahin karte

diwar to uThti hui dekhenge gharon mein

wo log jo bachchon ko nasihat nahin karte