kuchh muqaddar hi bura hai bulbul-e-nashad ka

kuchh muqaddar hī burā hai bulbul-e-nāshād kā

Dar kabhī bijlī kā rahtā hai kabhī sayyād kā

ġham nahīñ dil ho gayā barbād mujh barbād kā

mashġhala jaatā rahā zālim tirī bedād kā

haal to dekhe koī mujh ḳhānamāñ-barbād kā

maiñ nasheman ko bhī ghar samjhā kiyā sayyād kā

ab vahī maiñ huuñ ki apnī bhī ḳhabar rakhtā nahīñ

aur kabhī mamnūn rahtā thā kisī kī yaad kā

ai ḳhudā-e-ishq mujh ko aisī vahshat kar atā

bhuul jaa.eñ vāqi.a ahl-e-jahāñ farhād kā

kyoñ karam-āmez nazroñ se mujhe takte ho tum

imtihāñ madd-e-nazar hai kyā dil-e-barbād kā

kyā ajab hai 'ārzū' bhī jaan ab de de agar

aasrā ab tak to thā is ko tumhārī yaad kā

kuchh muqaddar hi bura hai bulbul-e-nashad ka

Dar kabhi bijli ka rahta hai kabhi sayyaad ka

gham nahin dil ho gaya barbaad mujh barbaad ka

mashghala jata raha zalim teri bedad ka

haal to dekhe koi mujh KHanaman-barbaad ka

main nasheman ko bhi ghar samjha kiya sayyaad ka

ab wahi main hun ki apni bhi KHabar rakhta nahin

aur kabhi mamnun rahta tha kisi ki yaad ka

ai KHuda-e-ishq mujh ko aisi wahshat kar ata

bhul jaen waqia ahl-e-jahan farhad ka

kyon karam-amez nazron se mujhe takte ho tum

imtihan madd-e-nazar hai kya dil-e-barbaad ka

kya ajab hai 'arzu' bhi jaan ab de de agar

aasra ab tak to tha is ko tumhaari yaad ka