kuchh na KHat mein na kuchh jawab mein hai

kuchh na ḳhat meñ na kuchh javāb meñ hai

jo bhī kuchh hai tire hisāb meñ hai

ye vafā bhī jafā ke baab meñ hai

jaan merī bhī ik azaab meñ hai

tere jalve se mehr-e-ālam-tāb

nuur jis tarah māhtāb meñ hai

apnī hai aur manzil-e-maqsūd

aap kā kūcha pāturāb meñ hai

kuchh na samjhe haqīqat-e-ālam

saarā hañgāma ek ḳhvāb meñ hai

tum ne kyā baat raat kah dī thī

ġhair bhī aaj iztirāb meñ hai

rashk-e-ishrat hai lazzat-e-hasrat

kuchh gunah meñ hai ne savāb meñ hai

hosh aa.egā ab qayāmat ko

saarī duniyā abhī to ḳhvāb meñ hai

jab se va.ada kiyā hai aane kā

'qādrī' un ke ro.ab-o-dāb meñ hai

kuchh na KHat mein na kuchh jawab mein hai

jo bhi kuchh hai tere hisab mein hai

ye wafa bhi jafa ke bab mein hai

jaan meri bhi ek azab mein hai

tere jalwe se mehr-e-alam-tab

nur jis tarah mahtab mein hai

apni hai aur manzil-e-maqsud

aap ka kucha paturab mein hai

kuchh na samjhe haqiqat-e-alam

sara hangama ek KHwab mein hai

tum ne kya baat raat kah di thi

ghair bhi aaj iztirab mein hai

rashk-e-ishrat hai lazzat-e-hasrat

kuchh gunah mein hai ne sawab mein hai

hosh aaega ab qayamat ko

sari duniya abhi to KHwab mein hai

jab se wada kiya hai aane ka

'qadri' un ke roab-o-dab mein hai