kuchh na pai dil ne taskin aur kuchh pai to kya

kuchh na paa.ī dil ne taskīñ aur kuchh paa.ī to kyā

aisī sūrat se tirī sūrat nazar aa.ī to kyā

ek dushman ke kahe par naaz vo bhī is qadar

apne matlab ko kisī ne aap kī gaa.ī to kyā

hosh aanā thā ki vo ḳhāse sitamgar ban ga.e

haa.e rī qismat ki un ko aql bhī aa.ī to kyā

o jafā-pesha shagufta ḳhātirī hai aur shai

yuuñ hañsī aane ko rone meñ hañsī aa.ī to kyā

aap apne dil se pūchheñ aap hī socheñ zarā

merī aahoñ meñ agar tāsīr bhī aa.ī to kyā

mere lāshe par agar tashrīf bhī laa.e to hech

ba.ad mere un ko merī yaad bhī aa.ī to kyā

apnī aadat se vo baaz aa jaa.eñ mumkin hī nahīñ

kahne-sunñe se ghaḌī-bhar ko hayā aa.ī to kyā

kuchh na kuchh aġhyār ne paTTī paḌhā.ī hai zarūr

tum ne khāne ko mire sar kī qasam khaa.ī to kyā

thā jo kuchh taqdīr kā honā vo ho kar hī rahā

karne vāloñ ne jo kī bhī chāra-farmā.ī to kyā

be-vafāoñ meñ to kuchh gintī nahīñ terī tarah

ham ko kahtī hai agar maḳhlūq saudā.ī to kyā

ai safī' tark-e-ta.alluq kar ke itrāte ho kyuuñ

umr-bhar meñ ye huī hai tum se dānā.ī to kyā

kuchh na pai dil ne taskin aur kuchh pai to kya

aisi surat se teri surat nazar aai to kya

ek dushman ke kahe par naz wo bhi is qadar

apne matlab ko kisi ne aap ki gai to kya

hosh aana tha ki wo KHase sitamgar ban gae

hae ri qismat ki un ko aql bhi aai to kya

o jafa-pesha shagufta KHatiri hai aur shai

yun hansi aane ko rone mein hansi aai to kya

aap apne dil se puchhen aap hi sochen zara

meri aahon mein agar tasir bhi aai to kya

mere lashe par agar tashrif bhi lae to hech

baad mere un ko meri yaad bhi aai to kya

apni aadat se wo baz aa jaen mumkin hi nahin

kahne-sunne se ghaDi-bhar ko haya aai to kya

kuchh na kuchh aghyar ne paTTi paDhai hai zarur

tum ne khane ko mere sar ki qasam khai to kya

tha jo kuchh taqdir ka hona wo ho kar hi raha

karne walon ne jo ki bhi chaara-farmai to kya

be-wafaon mein to kuchh ginti nahin teri tarah

hum ko kahti hai agar maKHluq saudai to kya

ai safi' tark-e-talluq kar ke itraate ho kyun

umr-bhar mein ye hui hai tum se danai to kya