kuchh na thi begam mue insan ki buniyaad bhi

kuchh na thī begam mue insān kī buniyād bhī

is janam meñ ho rahī hai us janm kī yaad bhī

den se allāh kī daulat bhī hai aulād bhī

ab unheñ kyā chāhiye bahūveñ bhī haiñ dāmād bhī

saas nandoñ se adāvat un se ulfat hai mujhe

shaad bhī sasurāl meñ huuñ aur maiñ nāshād bhī

jeTh kā muñh dekhtī huuñ kartī huuñ beTī kā paas

ye bhatījā bhī hai merā bībiyo dāmād bhī

kyoñ na kosoñ duur bhāgūñ terī sohbat se mue

khaaj meñ bhī to ladā hai ho gayā hai daad bhī

saut ke aage hai bakrī aur mere haq meñ sher

narm-dil bhī log kahte haiñ use jallād bhī

laal piile mujh pe mat ho tum baTāo apnā ḳhuun

joñk vaalī bhī yahīñ maujūd hai fassād bhī

haa.e kaisā ho gayā hai ḳhuun duniyā kā safed

joñk vaalī bhī na aa.ī mar gayā fassād bhī

aaj sābit ho gayā 'shaidā' tumhārī reḳhtī

ik purānī chiiz bhī hai ik na.ī ījād bhī

kuchh na thi begam mue insan ki buniyaad bhi

is janam mein ho rahi hai us janm ki yaad bhi

den se allah ki daulat bhi hai aulad bhi

ab unhen kya chahiye bahuwen bhi hain damad bhi

sas nandon se adawat un se ulfat hai mujhe

shad bhi sasural mein hun aur main nashad bhi

jeTh ka munh dekhti hun karti hun beTi ka pas

ye bhatija bhi hai mera bibiyo damad bhi

kyon na koson dur bhagun teri sohbat se mue

khaj mein bhi to lada hai ho gaya hai dad bhi

saut ke aage hai bakri aur mere haq mein sher

narm-dil bhi log kahte hain use jallad bhi

lal pile mujh pe mat ho tum baTao apna KHun

jonk wali bhi yahin maujud hai fassad bhi

hae kaisa ho gaya hai KHun duniya ka safed

jonk wali bhi na aai mar gaya fassad bhi

aaj sabit ho gaya 'shaida' tumhaari reKHti

ek purani chiz bhi hai ek nai ijad bhi