kuchh nahin chashm-e-talab ku-e-butan se aage

kuchh nahīñ chashm-e-talab kū-e-butāñ se aage

koī baḌhtā hī nahīñ vahm-o-gumāñ se aage

ek āvāz hai iqlīm-e-suḳhan ke nazdīk

ek saaya hai mire sāya-e-jāñ se aage

lafz tāsīr kī hiddat se pighal jaate haiñ

ahl-e-dil aaj bhī haiñ ahl-e-zabāñ se aage

dast-e-imroz utāregā ye fardā kā naqāb

dekh pā.egī nazar kaun-o-makāñ se aage

'ishq zardār hai rakhtā hai vafā kī daulat

'aql nikle to kabhī sūd-o-ziyāñ se aage

un kī sohbat to mayassar rahī dil ko lekin

guftugū baḌh na sakī husn-e-bayāñ se aage

jo bhī nikle haiñ vo mā'dūm hue haiñ āḳhir

qāfile rahrav-e-gum-karda-nishāñ se aage

siikh paa.e na 'muzaffar' kabhī ādāb-e-junūñ

ham ne sochā hī nahīñ kār-e-jahāñ se aage

kuchh nahin chashm-e-talab ku-e-butan se aage

koi baDhta hi nahin wahm-o-guman se aage

ek aawaz hai iqlim-e-suKHan ke nazdik

ek saya hai mere saya-e-jaan se aage

lafz tasir ki hiddat se pighal jate hain

ahl-e-dil aaj bhi hain ahl-e-zaban se aage

dast-e-imroz utarega ye farda ka naqab

dekh paegi nazar kaun-o-makan se aage

'ishq zardar hai rakhta hai wafa ki daulat

'aql nikle to kabhi sud-o-ziyan se aage

un ki sohbat to mayassar rahi dil ko lekin

guftugu baDh na saki husn-e-bayan se aage

jo bhi nikle hain wo ma'dum hue hain aaKHir

qafile rahraw-e-gum-karda-nishan se aage

sikh pae na 'muzaffar' kabhi aadab-e-junun

hum ne socha hi nahin kar-e-jahan se aage