kuchh ne aankhen kuchh ne chehra dekha hai

kuchh ne āñkheñ kuchh ne chehra dekhā hai

sab ne tujh ko thoḌā thoḌā dekhā hai

tum par pyaas ke ma.anī khulne vaale nahīñ

tum ne paanī pī kar dariyā dekhā hai

jin hāthoñ ko chūmne aa jaate the log

aaj unhīñ hāthoñ meñ kaasa dekhā hai

rotī āñkheñ ye sun kar ḳhāmosh huiiñ

malbe meñ ik shaḳhs ko zinda dekhā hai

baabā bolā merī qismat achchhī hai

us ne shāyad haath tumhārā dekhā hai

lagtā hai maiñ pyaas se marne vaalā huuñ

maiñ ne kal shab ḳhvāb meñ sahrā dekhā hai

andhī duniyā ko maiñ kaise samjhā.ūñ

in āñkhoñ se maiñ ne kyā kyā dekhā hai

qaidī raat ko bhāgne vaalā hai 'tābish'

us ne ḳhvāb meñ ḳhufiya rasta dekhā hai

kuchh ne aankhen kuchh ne chehra dekha hai

sab ne tujh ko thoDa thoDa dekha hai

tum par pyas ke mani khulne wale nahin

tum ne pani pi kar dariya dekha hai

jin hathon ko chumne aa jate the log

aaj unhin hathon mein kasa dekha hai

roti aankhen ye sun kar KHamosh huin

malbe mein ek shaKHs ko zinda dekha hai

baba bola meri qismat achchhi hai

us ne shayad hath tumhaara dekha hai

lagta hai main pyas se marne wala hun

main ne kal shab KHwab mein sahra dekha hai

andhi duniya ko main kaise samjhaun

in aankhon se main ne kya kya dekha hai

qaidi raat ko bhagne wala hai 'tabish'

us ne KHwab mein KHufiya rasta dekha hai