kuchh ek pal jo bhulae hue se lagte hain

kuchh ek pal jo bhulā.e hue se lagte haiñ

nazar meñ ab bhī samā.e hue se lagte haiñ

ye intizār ke lamhoñ kā hai ajiib fareb

vo aa rahe haiñ vo aa.e hue se lagte haiñ

huī hai yuuñ to bahut un meñ rang-āmezī

magar ye qisse sunā.e hue se lagte haiñ

har ek baat meñ gholā hai us ne ras lekin

tamām lafz chabā.e hue se lagte haiñ

ba-vaqt-e-shām vo jaage haiñ haath malte hue

asāsa saarā gañvā.e hue se lagte haiñ

yuuñ oḌhe phirte haiñ mazlūmiyat kā do-shāla

zamāne-bhar ke satā.e hue se lagte haiñ

Tapak rahī hai 'tabassum' se un ke be-zārī

jale bhune haiñ jalā.e hue se lagte haiñ

kuchh ek pal jo bhulae hue se lagte hain

nazar mein ab bhi samae hue se lagte hain

ye intizar ke lamhon ka hai ajib fareb

wo aa rahe hain wo aae hue se lagte hain

hui hai yun to bahut un mein rang-amezi

magar ye qisse sunae hue se lagte hain

har ek baat mein ghola hai us ne ras lekin

tamam lafz chabae hue se lagte hain

ba-waqt-e-sham wo jage hain hath malte hue

asasa sara ganwae hue se lagte hain

yun oDhe phirte hain mazlumiyat ka do-shaala

zamane-bhar ke satae hue se lagte hain

Tapak rahi hai 'tabassum' se un ke be-zari

jale bhune hain jalae hue se lagte hain