kuchh raat ki aahen hoti hain kuchh subh ke nale hote hain

kuchh raat kī aaheñ hotī haiñ kuchh sub.h ke naale hote haiñ

bīmār-e-alam ko furqat ke bas yahī sañbhāle hote haiñ

jab dard jigar meñ uThtā hai ik hazz-e-vasl sā miltā hai

furqat meñ taḌapte dil ke bhī andāz nirāle hote haiñ

mil jaatī hai manzil bhī aksar rāhoñ meñ bhaTakne vāloñ ko

jo maut kī ghaḌiyāñ ginte haiñ un ke bhī sañbhāle hote haiñ

ik aisā zamāna aatā hai jab bigḌī qismat bantī hai

rātoñ kī siyāhī se aage phir din ke ujāle hote haiñ

jab zabt kī had ho jaatī hai tab ashk nikal hī jaate haiñ

āḳhir vo chhalak hī paḌte haiñ labrez jo pyāle hote haiñ

jab fasl-e-gul aa jaatī hai vahshat bhī javāñ ho jaatī hai

khilte haiñ chaman meñ jitne gul vo paañv meñ chhāle hote haiñ

hote haiñ hasīñ shab ke manzar har roz kisī kī zulfoñ meñ

us vaqt kā aalam kyā kahiye jab maañg nikāle hote haiñ

vo aañkh ke khulte hī lekin hotī haiñ garebāñ meñ apne

jo bāheñ un kī gardan meñ ham ḳhvāb meñ Daale hote haiñ

aatā hai mohabbat meñ 'sāqib' ik vaqt bhī aisā insāñ par

marnā bhī nahīñ hotā āsāñ jiine ke bhī laale hote haiñ

kuchh raat ki aahen hoti hain kuchh subh ke nale hote hain

bimar-e-alam ko furqat ke bas yahi sanbhaale hote hain

jab dard jigar mein uThta hai ek hazz-e-wasl sa milta hai

furqat mein taDapte dil ke bhi andaz nirale hote hain

mil jati hai manzil bhi aksar rahon mein bhaTakne walon ko

jo maut ki ghaDiyan ginte hain un ke bhi sanbhaale hote hain

ek aisa zamana aata hai jab bigDi qismat banti hai

raaton ki siyahi se aage phir din ke ujale hote hain

jab zabt ki had ho jati hai tab ashk nikal hi jate hain

aaKHir wo chhalak hi paDte hain labrez jo pyale hote hain

jab fasl-e-gul aa jati hai wahshat bhi jawan ho jati hai

khilte hain chaman mein jitne gul wo panw mein chhaale hote hain

hote hain hasin shab ke manzar har roz kisi ki zulfon mein

us waqt ka aalam kya kahiye jab mang nikale hote hain

wo aankh ke khulte hi lekin hoti hain gareban mein apne

jo bahen un ki gardan mein hum KHwab mein Dale hote hain

aata hai mohabbat mein 'saqib' ek waqt bhi aisa insan par

marna bhi nahin hota aasan jine ke bhi lale hote hain