kuchh roz aazmaoge aur lauT jaoge

kuchh roz āzmāoge aur lauT jāoge

tum bhī qarīb aaoge aur lauT jāoge

man-māniyāñ karoge to phir mere sāth-sāth

apnā bhī dil dukhāoge aur lauT jāoge

tum bhī zamīn-e-dil pe yaqīnan mire habīb

zaḳhmoñ ke ghar banāoge aur lauT jāoge

is baat kā pata hameñ pahle na thā ki tum

nīchā hameñ dikhāoge aur lauT jāoge

maiñ jāntā huuñ tum ko bhalī-bhāñti ġham-gusār

apnī hī bas sunāoge aur lauT jāoge

itne dinoñ meñ ham ne ye sochā na ek din

tum bhī hameñ satāoge aur lauT jāoge

kamre meñ aaj aaya to dīvār ne kahā

phir us ke ḳhat jalāo.ge aur lauT jāoge

va.ada to kar rahe ho magar jāntā huuñ tum

matlab talak nibhāoge aur lauT jāoge

'sohil' tumhārī zindagī dhokoñ se hai bharī

do-chār phir se khāoge aur lauT jāoge

kuchh roz aazmaoge aur lauT jaoge

tum bhi qarib aaoge aur lauT jaoge

man-maniyan karoge to phir mere sath-sath

apna bhi dil dukhaoge aur lauT jaoge

tum bhi zamin-e-dil pe yaqinan mere habib

zaKHmon ke ghar banaoge aur lauT jaoge

is baat ka pata hamein pahle na tha ki tum

nicha hamein dikhaoge aur lauT jaoge

main jaanta hun tum ko bhali-bhanti gham-gusar

apni hi bas sunaoge aur lauT jaoge

itne dinon mein hum ne ye socha na ek din

tum bhi hamein sataoge aur lauT jaoge

kamre mein aaj aaya to diwar ne kaha

phir us ke KHat jalaoge aur lauT jaoge

wada to kar rahe ho magar jaanta hun tum

matlab talak nibhaoge aur lauT jaoge

'sohil' tumhaari zindagi dhokon se hai bhari

do-chaar phir se khaoge aur lauT jaoge