kuchh roz se main bhi bahut aasudgi ke sath hun

kuchh roz se maiñ bhī bahut āsūdgī ke saath huuñ

ab koī mere saath hai yā maiñ kisī ke saath huuñ

paivast hai mere lahū meñ zāhir-o-bātin kī zau

āzurdagī ke saath huuñ jab se ḳhushī ke saath huuñ

ik bojh hai ab mere siine par mirī maujūdgī

maiñ saath huuñ apne magar ik be-ruḳhī ke saath huuñ

kyā soch kar maiñ ne qadam rakkhā thā dasht-e-najd meñ

kyuuñ ġhaib se utrī huī āvārgī ke saath huuñ

maiñ saath huuñ us ke bahar-sūrat tulū-e-mehr tak

sanjīdgī ke saath huuñ yā dil-lagī ke saath huuñ

kahtā nahīñ suntā nahīñ hañstā nahīñ rotā nahīñ

maiñ bhī azal se aaj tak kaise ġhabī ke saath huuñ

ik mauj meñ baḌhtā chalā jaatā huuñ manzil kī taraf

ya.anī fanā kī raah par maiñ bhī sabhī ke saath huuñ

kuchh ḳhauf khāne kī zarūrat hai na lāzim ehtiyāt

maiñ lashkarī huuñ aap kā aur aap hī ke saath huuñ

muddat huī hai ḳhud-farebī ke zamāne ko lade

ab jo mirā ho kar rahegā maiñ usī ke saath huuñ

'sājid' abhī tak qarz hai mujh par mirī pahchān kā

shāmil kisī ke rañg meñ apnī kamī ke saath huuñ

kuchh roz se main bhi bahut aasudgi ke sath hun

ab koi mere sath hai ya main kisi ke sath hun

paiwast hai mere lahu mein zahir-o-baatin ki zau

aazurdagi ke sath hun jab se KHushi ke sath hun

ek bojh hai ab mere sine par meri maujudgi

main sath hun apne magar ek be-ruKHi ke sath hun

kya soch kar main ne qadam rakkha tha dasht-e-najd mein

kyun ghaib se utri hui aawargi ke sath hun

main sath hun us ke bahar-surat tulu-e-mehr tak

sanjidgi ke sath hun ya dil-lagi ke sath hun

kahta nahin sunta nahin hansta nahin rota nahin

main bhi azal se aaj tak kaise ghabi ke sath hun

ek mauj mein baDhta chala jata hun manzil ki taraf

yani fana ki rah par main bhi sabhi ke sath hun

kuchh KHauf khane ki zarurat hai na lazim ehtiyat

main lashkari hun aap ka aur aap hi ke sath hun

muddat hui hai KHud-farebi ke zamane ko lade

ab jo mera ho kar rahega main usi ke sath hun

'sajid' abhi tak qarz hai mujh par meri pahchan ka

shamil kisi ke rang mein apni kami ke sath hun