kuchh rup-nagar ka zikr karo kuchh rang-mahal ki baat karo

kuchh rūp-nagar kā zikr karo kuchh rañg-mahal kī baat karo

rañgīn fazā hai mahfil kī rañgīn ġhazal kī baat karo

rindoñ ko na ab Tāloñ kal par rindoñ se na kal kī baat karo

tum aaj hamāre saaqī ho tum aaj na halkī baat karo

hai sub.h-e-banaras ruup us kā to shām-e-avadh gesū us ke

vo merī ġhazal hai merī ġhazal tum merī ġhazal kī baat karo

taqrīr kī lazzat be-ma.anī tahrīr kī nudrat lā-hāsil

ye fikr-o-amal kī hai duniyā kuchh fikr-o-amal kī baat karo

baiThe ho 'azīz' apne aise ahbāb kī rañgīñ mahfil meñ

tauba ke tasavvur se pahle īmāñ ke ḳhalal kī baat karo

kuchh rup-nagar ka zikr karo kuchh rang-mahal ki baat karo

rangin faza hai mahfil ki rangin ghazal ki baat karo

rindon ko na ab Talon kal par rindon se na kal ki baat karo

tum aaj hamare saqi ho tum aaj na halki baat karo

hai subh-e-banaras rup us ka to sham-e-awadh gesu us ke

wo meri ghazal hai meri ghazal tum meri ghazal ki baat karo

taqrir ki lazzat be-mani tahrir ki nudrat la-hasil

ye fikr-o-amal ki hai duniya kuchh fikr-o-amal ki baat karo

baiThe ho 'aziz' apne aise ahbab ki rangin mahfil mein

tauba ke tasawwur se pahle iman ke KHalal ki baat karo