kuchh sae se har lahza kisi samt rawan hain

kuchh saa.e se har lahza kisī samt ravāñ haiñ

is shahr meñ varna na makīñ haiñ na makāñ haiñ

ham ḳhud se judā hauke tujhe DhūñDne nikle

bikhre haiñ ab aise ki yahāñ haiñ na vahāñ haiñ

jaatī haiñ tire ghar ko sabhī shahr kī rāheñ

lagtā hai ki sab log tirī samt ravāñ haiñ

ai mauja-e-āvāra kabhī ham se bhī Takrā

ik umr se ham bhī sar-e-sāhil nigarāñ haiñ

simTe the kabhī ham to samā.e sar-e-mizhgāñ

phaile haiñ ab aise ki karāñ tā-ba-karāñ haiñ

tū DhūñD hameñ vaqt kī dīvār ke us paar

ham duur bahut duur kī manzil kā nishāñ haiñ

ik din tire āñchal kī havā ban ke uḌe the

us din se zamāne kī nigāhoñ pe garāñ haiñ

toḌo na hamāre liye āvāz kā āhañg

ham log to ik Dūbte lamhe kī fuġhāñ haiñ

vo jin se farozāñ huā ik ālam-e-imkāñ

vo chāñd-sifat log 'rashīd' aaj kahāñ haiñ

kuchh sae se har lahza kisi samt rawan hain

is shahr mein warna na makin hain na makan hain

hum KHud se juda hauke tujhe DhunDne nikle

bikhre hain ab aise ki yahan hain na wahan hain

jati hain tere ghar ko sabhi shahr ki rahen

lagta hai ki sab log teri samt rawan hain

ai mauja-e-awara kabhi hum se bhi Takra

ek umr se hum bhi sar-e-sahil nigaran hain

simTe the kabhi hum to samae sar-e-mizhgan

phaile hain ab aise ki karan ta-ba-karan hain

tu DhunD hamein waqt ki diwar ke us par

hum dur bahut dur ki manzil ka nishan hain

ek din tere aanchal ki hawa ban ke uDe the

us din se zamane ki nigahon pe garan hain

toDo na hamare liye aawaz ka aahang

hum log to ek Dubte lamhe ki fughan hain

wo jin se farozan hua ek aalam-e-imkan

wo chand-sifat log 'rashid' aaj kahan hain