kuchh sham se puchho na shab-e-tar se puchho

kuchh sham' se pūchho na shab-e-tār se pūchho

kyā hijr meñ biitī ye dil-e-zār se pūchho

sausan se na kuchh nargis-e-bīmār se pūchho

tārājī-e-gulshan kā sabab ḳhaar se pūchho

zahmat na do aise meñ na bīmār se pūchho

kyā haal hai ye nabz kī raftār se pūchho

kyuuñ dast-e-hinā.ī dil-e-āzār se pūchho

rañg-e-gul-e-lāla lab-o-ruḳhsār se pūchho

yaaro se karo mashvara aġhyār se pūchho

kab tak vo raheñge khiche talvār se pūchho

kirdār se raftār se guftār se pūchho

kyā kaun hai ye us kī hī me'yār se pūchho

dil se na ye qurbānī-o-īsār se pūchho

aqdār-e-vafā husn ke bāzār se pūchho

mumkin nahīñ jo dil meñ hai us ko na ugal de

dushman se bhī ik baar agar pyaar se pūchho

ā.īna-e-ehsās ḳhad-o-ḳhāl hasīñ haiñ

tāsīr-e-vafā rañg-e-ruḳh-e-yār se pūchho

rah rah ke maze detī hai kyā kyā ḳhalish-e-zaḳhm

ye dard-e-mohabbat ke ḳharīdār se pūchho

kah uTThe anal-haq nahīñ har ik kā kalejā

is zarf ko ahl-e-rasan-o-dār se pūchho

jannat kā jumūd achchhā hai yā kashmakash-e-ishq

ye jurm mohabbat ke gunahgār se pūchho

kyuuñ rang uḌā kaliyoñ kā kyuuñ chup haiñ 'anādil

gulshan ke jagah-dār ke kirdār se pūchho

kahte kise mehrāb-e-haram kyā hai mah-e-nau

us shoḳh ke ye abrū-e-ḳhamdār se pūchho

lākhoñ kā lahū pī ke bhī be dard abhī tak

kyuuñ ḳhuun kī pyāsī hai ye talvār se pūchho

zanjīr-e-mohabbat kī asīrī meñ hai kyā lutf

pech-o-ḳham-e-kākul ke giraftār se pūchho

dānista nahīñ bande se koī huī taqsīr

phir kis liye bargashta haiñ sarkār se pūchho

dil vāloñ se bas pūchho hai kyā rishta-e-ulfat

tasbīh se pūchho na ye zunnār se pūchho

ik us ke chale jaane se kyā haal hai 'māhir'

hasrat-zada ghar ke dar-o-dīvār se pūchho

kuchh sham' se puchho na shab-e-tar se puchho

kya hijr mein biti ye dil-e-zar se puchho

sausan se na kuchh nargis-e-bimar se puchho

taraji-e-gulshan ka sabab KHar se puchho

zahmat na do aise mein na bimar se puchho

kya haal hai ye nabz ki raftar se puchho

kyun dast-e-hinai dil-e-azar se puchho

rang-e-gul-e-lala lab-o-ruKHsar se puchho

yaro se karo mashwara aghyar se puchho

kab tak wo rahenge khiche talwar se puchho

kirdar se raftar se guftar se puchho

kya kaun hai ye us ki hi me'yar se puchho

dil se na ye qurbani-o-isar se puchho

aqdar-e-wafa husn ke bazar se puchho

mumkin nahin jo dil mein hai us ko na ugal de

dushman se bhi ek bar agar pyar se puchho

aaina-e-ehsas KHad-o-KHal hasin hain

tasir-e-wafa rang-e-ruKH-e-yar se puchho

rah rah ke maze deti hai kya kya KHalish-e-zaKHm

ye dard-e-mohabbat ke KHaridar se puchho

kah uTThe anal-haq nahin har ek ka kaleja

is zarf ko ahl-e-rasan-o-dar se puchho

jannat ka jumud achchha hai ya kashmakash-e-ishq

ye jurm mohabbat ke gunahgar se puchho

kyun rang uDa kaliyon ka kyun chup hain 'anadil

gulshan ke jagah-dar ke kirdar se puchho

kahte kise mehrab-e-haram kya hai mah-e-nau

us shoKH ke ye abru-e-KHamdar se puchho

lakhon ka lahu pi ke bhi be dard abhi tak

kyun KHun ki pyasi hai ye talwar se puchho

zanjir-e-mohabbat ki asiri mein hai kya lutf

pech-o-KHam-e-kakul ke giraftar se puchho

danista nahin bande se koi hui taqsir

phir kis liye bargashta hain sarkar se puchho

dil walon se bas puchho hai kya rishta-e-ulfat

tasbih se puchho na ye zunnar se puchho

ek us ke chale jaane se kya haal hai 'mahir'

hasrat-zada ghar ke dar-o-diwar se puchho