kuchh sukun paun jo is sahn-e-makan se chhuTun

kuchh sukūñ pā.ūñ jo is sahn-e-makāñ se chhūTūñ

phir nayā ek safar ho maiñ jahāñ se chhūTūñ

saare ehsās se har sūd-o-ziyāñ se chhūTūñ

ho ke ḳhāmosh gunāhān-e-bayāñ se chhūTūñ

tund-ḳhū tāzī-e-be-bāk ḳhirāmāñ kī qasam

kaash raftār-o-ram-o-raḳhsh-e-ravāñ se chhūTūñ

muzmahil ho ke Thaharne nahīñ detī sur.at

kaash āzād ho tausan ki inaañ se chhūTūñ

zikr kuchh dil kā na kuchh baat tamannāoñ kī

ḳhushk āñkheñ hoñ maiñ īzā-e-fuġhāñ se chhūTūñ

raqs ho ātish-e-sayyāl kā aur ḳhaak huuñ maiñ

gardish-e-shām-o-sahar dahr-o-zamāñ se chhūTūñ

tā.er-e-rūh har ik gosha-e-jāñ dekhtā hai

jism se jaan se kis dar se kahāñ se chhūTūñ

chhūTūñ 'farhat' se aziyyat se sukūñ se ġham se

nā-tavānī se sahī tāb-o-tavāñ se chhūTūñ

kuchh sukun paun jo is sahn-e-makan se chhuTun

phir naya ek safar ho main jahan se chhuTun

sare ehsas se har sud-o-ziyan se chhuTun

ho ke KHamosh gunahan-e-bayan se chhuTun

tund-KHu tazi-e-be-bak KHiraman ki qasam

kash raftar-o-ram-o-raKHsh-e-rawan se chhuTun

muzmahil ho ke Thaharne nahin deti surat

kash aazad ho tausan ki inan se chhuTun

zikr kuchh dil ka na kuchh baat tamannaon ki

KHushk aankhen hon main iza-e-fughan se chhuTun

raqs ho aatish-e-sayyal ka aur KHak hun main

gardish-e-sham-o-sahar dahr-o-zaman se chhuTun

taer-e-ruh har ek gosha-e-jaan dekhta hai

jism se jaan se kis dar se kahan se chhuTun

chhuTun 'farhat' se aziyyat se sukun se gham se

na-tawani se sahi tab-o-tawan se chhuTun