kuchh to fughan ka KHair bahana hi hota hai

kuchh to fuġhāñ kā ḳhair bahāna hī hotā hai

kuchh kam samā'atoñ ko sunānā bhī hotā hai

dekho hamāre chāk-e-garebāñ pe ḳhush na ho

ye hai junūñ aur is kā nishāna bhī hotā hai

āzād-gāñ ko ḳhāna-ḳharābī kā kyā malāl

kyā mauj-e-gul kā koī Thikāna bhī hotā hai

ham is jagah meñ ḳhush haiñ ki aise ḳharāboñ meñ

sāñpoñ ke saath saath ḳhazāna bhī hotā hai

maiñ kyoñ Darūñ ki jaan se jaatā huuñ ek baar

dushman ko mere lauT ke aanā bhī hotā hai

ab aap log sūd-o-ziyāñ sochte raheñ

banda to chauthī samt ravāna bhī hotā hai

kuchh to fughan ka KHair bahana hi hota hai

kuchh kam sama'aton ko sunana bhi hota hai

dekho hamare chaak-e-gareban pe KHush na ho

ye hai junun aur is ka nishana bhi hota hai

aazad-gan ko KHana-KHarabi ka kya malal

kya mauj-e-gul ka koi Thikana bhi hota hai

hum is jagah mein KHush hain ki aise KHarabon mein

sanpon ke sath sath KHazana bhi hota hai

main kyon Darun ki jaan se jata hun ek bar

dushman ko mere lauT ke aana bhi hota hai

ab aap log sud-o-ziyan sochte rahen

banda to chauthi samt rawana bhi hota hai